Qozog‘iston Tashqi ishlar vazirligiga Amerika qurolli kuchlari bilan hamkorlik qilgan afg‘onistonlik qochqinlarni o‘z hududiga joylashtirish ehtimoli to‘g‘risida AQShdan murojaat kelib tushmagan. Bu haqda Qozog‘iston tashqi ishlar vazirligi matbuot xizmatiga tayanib, “TASS” xabar berdi.
“Tashqi ishlar vazirligiga AQSh rasmiy ravishda bunday murojaat bilan chiqmagan” — deya xabar qildi matbuot xizmati AQSh afg‘on qochqinlarini qabul qilish to‘g‘risida Qozog‘istonga murojaat qilganmi yoki yo‘qmi, degan savolga javoban.
Avvalroq Bloomberg AQSh prezidenti Jo Bayden ma’muriyati Qozog‘iston, Tojikiston va O‘zbekistondan o‘z hududlariga AQSh Qurolli kuchlari bilan ishlagan 9 mingga yaqin afg‘onlarni vaqtincha joylashtirishni so‘ragani haqida xabar bergan edi. Ayni paytda AQSh qo‘shinlari Afg‘onistonni tark etmoqda. Harbiylarni olib chiqish jarayoni 11-sentabrga qadar yakunlanishi kerak. Amerikaliklar bilan hamkorlik qilgan afg‘onlar ham ushbu muddatga qadar mamlakatni tark etishga shoshilmoqda. Mazkur fuqarolar AQSh harbiylari bilan ishlagani uchun endilikda “Tolibon”ning o‘ch olishidan qo‘rqmoqda.
Avvalroq Afg‘onistondagi rossiyalik diplomatlar vaqtincha O‘zbekistonga ko‘chirilgani haqida xabar berilgandi. Ta’kidlanishicha, konsullik xodimlari afg‘on-o‘zbek chegarasi yaqinidagi Xayraton shahrida fuqarolarni qabul qilishni davom ettiradi.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. So‘nggi ma’lumotlarga ko‘ra, AQSh Afg‘onistondagi harbiy kontingentining 90 foizdan ko‘prog‘ini olib chiqib ketdi.
Avvalroq “Tolibon” barcha chet el qo‘shinlari Afg‘onistonni o‘z muddatida tark etishini talab qilgani haqida xabar berilgandi. AQSh Afg‘onistondan o‘z qo‘shinlarini olib chiqish amaliyoti avgust oxiriga qadar tugashini ma’lum qildi.
Bugunga qadar Germaniya, Italiya va Avstraliya Afg‘onistondan o‘z qo‘shinlarini olib chiqishni yakunladi.
Izoh (0)