Қозоғистон Ташқи ишлар вазирлигига Америка қуролли кучлари билан ҳамкорлик қилган афғонистонлик қочқинларни ўз ҳудудига жойлаштириш эҳтимоли тўғрисида АҚШдан мурожаат келиб тушмаган. Бу ҳақда Қозоғистон ташқи ишлар вазирлиги матбуот хизматига таяниб, «ТАСС» хабар берди.
«Ташқи ишлар вазирлигига АҚШ расмий равишда бундай мурожаат билан чиқмаган» — дея хабар қилди матбуот хизмати АҚШ афғон қочқинларини қабул қилиш тўғрисида Қозоғистонга мурожаат қилганми ёки йўқми, деган саволга жавобан.
Аввалроқ Bloomberg АҚШ президенти Жо Байден маъмурияти Қозоғистон, Тожикистон ва Ўзбекистондан ўз ҳудудларига АҚШ Қуролли кучлари билан ишлаган 9 мингга яқин афғонларни вақтинча жойлаштиришни сўрагани ҳақида хабар берган эди. Айни пайтда АҚШ қўшинлари Афғонистонни тарк этмоқда. Ҳарбийларни олиб чиқиш жараёни 11 сентябрга қадар якунланиши керак. Америкаликлар билан ҳамкорлик қилган афғонлар ҳам ушбу муддатга қадар мамлакатни тарк этишга шошилмоқда. Мазкур фуқаролар АҚШ ҳарбийлари билан ишлагани учун эндиликда «Толибон»нинг ўч олишидан қўрқмоқда.
Аввалроқ Афғонистондаги россиялик дипломатлар вақтинча Ўзбекистонга кўчирилгани ҳақида хабар берилганди. Таъкидланишича, консуллик ходимлари афғон-ўзбек чегараси яқинидаги Хайратон шаҳрида фуқароларни қабул қилишни давом эттиради.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.
Аввалроқ «Толибон» барча чет эл қўшинлари Афғонистонни ўз муддатида тарк этишини талаб қилгани ҳақида хабар берилганди. АҚШ Афғонистондан ўз қўшинларини олиб чиқиш амалиёти август охирига қадар тугашини маълум қилди.
Бугунга қадар Германия, Италия ва Австралия Афғонистондан ўз қўшинларини олиб чиқишни якунлади.
Изоҳ (0)