“Tolibon” barcha chet el qo‘shinlari Afg‘onistonni o‘z muddatida tark etishini talab qildi

Afg‘onistondagi “Tolibon” harakati vakili Suxail Shahin BBC News’ga bergan intervyusida chet el qo‘shinlarining barchasi Afg‘onistonni belgilangan muddatgacha tark etishi shartligini aytib o‘tdi. Boshqa mamlakatlarning Afg‘onistonda qolgan kontingentlariga istilochi sifatida qaraladi, deya qo‘shib qo‘ydi Shahin. Uning bayonoti Afg‘onistonda mingga yaqin harbiy qolishi mumkinligi, ularning katta qismini amerikaliklar tashkil etishi haqidagi axborot fonida yangradi.

Shahinning ta’kidlashicha, diplomatlar, nohukumat tashkilotlar va boshqa davlat fuqarolari “Tolibon” uchun nishon bo‘lmaydi, ular uchun hech qanday himoyaga ehtiyoj yo‘q.

“Biz ular uchun hech qanaqa xavf tug‘dirmaymiz”, — dedi u va Afg‘oniston uchun ularning faoliyati zarurligini qo‘shib qo‘ydi.

4-iyul kuni kechqurun “Tolibon” jangarilarining siquvi ostida yana 94 nafar afg‘on harbiysi Tojikiston hududiga chekindi, jangarilar Badaxshon viloyatining Xoxon uyezdini hech qanday jangsiz qo‘lga kiritgani aytilmoqda.

Avvalroq “Tolibon” harakati jangarilari so‘nggi 24 soat ichida Afg‘onistonning 13 ta tumanini o‘z nazorati ostiga olgani, shuningdek, jangarilar bilan to‘qnashuvdan keyin chekingan 300 dan ortiq Afg‘oniston harbiylarini Tojikiston chegarachilari o‘z mamlakati hududiga kiritgani haqida xabar berilgan edi.

Eslatib o‘tamiz, Amerika va NATO mamlakatlari qo‘shinlari 29-apreldan Afg‘onistondan chiqib ketishni boshladi. Iyun oyi boshida AQSh Afg‘onistondan o‘z qo‘shinlarining uchdan bir qismini olib chiqib ketgani xabar berilgandi. Shuningdek, Afg‘onistondagi NATO missiyasi tugagandan so‘ng Turkiya harbiy kuchlari Kobul aeroporti xavfsizligini ta’minlashda yetakchi rolni egallashi haqida AQSh va Turkiya prezidentlari Jo Bayden va Rajab Toyyib Erdo‘g‘on kelishib olgan edi.

Associated Press xabariga ko‘ra, AQSh qo‘shinlarining asosiy qismini olib chiqqanidan keyin Afg‘onistonda 650 ga yaqin amerikalik harbiyni qoldirmoqchi. Ta’kidlanishicha, Afg‘onistonda qoladigan harbiylar diplomatlarning xavfsizligini ta’minlaydi.

Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunladi.