Tramp AQSh prezidenti saylovida qatnashish masalasida bir qarorga keldi

AQSh sobiq prezidenti Donald Tramp navbatdagi prezidentlik saylovlarida qatnashish yoki qatnashmaslik to‘g‘risida bir qarorga kelganini aytdi. Bu haqda siyosatchining Fox News telekanaliga bergan intervyusiga tayanib “RBK” xabar berdi.

“Men javobni bilaman, ammo uni hozircha oshkor qila olmayman, chunki bu kampaniyani moliyalashtirishga va boshqa narsalarga ta’sir qilishi mumkin. Lekin menda aniq javob bor”, — dedi Tramp navbatdagi prezidentlik poygasida qatnashish niyati bor-yo‘qligi haqidagi savolga javoban.

AQShda so‘nggi prezidentlik saylovlari 2020-yilning 3-noyabr kuni bo‘lib o‘tgandi. Saylovchilarning faol ishtiroki va pochta orqali yuborilgan ovozlar soni ko‘p bo‘lgani sababli natijalar kechroq e’lon qilingan. Oxir-oqibat Tramp raqibi — demokrat Jo Baydenga yutqazgani ma’lum bo‘ldi. Tramp 232 ovoz, Bayden esa 302 ovozni qo‘lga kiritgandi.

Tramp saylovlar soxtalashtirilgan deb hisoblaydi, uning jamoasi bir necha bor natijalarni sud orqali bekor qilishga urinib ko‘rgan, ammo bu ish bermagan. Ba’zi shtatlar byulletenlarni qayta sanab chiqdi, ammo bu natijalarga ta’sir qilmadi.

Fevral oyida Tramp 2024-yilgi prezidentlik saylovlarida yana qatnashish niyati haqida gapirishga hali erta ekanini ta’kidladi, ammo uning so‘zlariga ko‘ra, Tramp AQSh aholisi tomonidan keng qo‘llab-quvvatlanmoqda. “Raqamlar juda yaxshi, juda yuqori. O‘ylaymanki, ular saylovlar chog‘idagi ko‘rsatkichlardan ham yuqoriroq, o‘zi o‘shanda ham yuqori edi”, — dedi u.

Mart oyida siyosatchi 2024-yilda yana davlat rahbari lavozimiga nomzodini qo‘yishi mumkinligini aytdi va tarafdorlari undan “umidvor”ligini qo‘shimcha qildi. Aprel oyida sobiq prezident navbatdagi saylovlarda qatnashish g‘oyasiga jiddiy munosabatda ekanini bildirdi. “Sizga shuni aytishim mumkin: men buni juda jiddiy qabul qilaman. Jiddiydan ham ortiq. Ammo yuridik nuqtayi nazardan, bu ma’lumotni tarqatib yubormoqchi emasman, bunga hali erta”, — degan Tramp.