Xaiomi Mi 11 Ultra’ning yangi rejimida smartfonning uzoq muddat avtonomligini ta’minlay olishi ma’lum bo‘ldi, deb xabar beradi Hi-Tech.Mail.ru.
Xiaomi Mi 11 Ultra — Xitoy kompaniyasi tomonidan hozirga qadar taqdim etilgan eng qimmat smartfonlardan biri. O‘zidan oldingi Mi seriyasidagi flagman modellardan farqli ravishda u Samsung va Apple mahsulotlari bilan to‘g‘ridan to‘g‘ri raqobatlasha oladi. Smartfonning o‘ziga xosligi — qo‘shimcha orqa displeyga ega ekanligida. Aftidan, tizimning so‘nggi yangilanishidan keyin mitti ekran yanada foydaliga aylangan.
Xitoyda Mi 11 Ultra uchun dasturiy ta’minotning yangilangan versiyasi chiqarilgan. Yangilanish V12.5.10.0.RKACNXM yig‘ish raqami ostida taqdim etilmoqda. U Super Power Saver nomi ostidagi yangi funksiyani qo‘shadi. Nomidan bilish mumkinki, ushbu rejim foydalanuvchi o‘z qurilmasini quvvatlantira olmagan vaqtda smartfon akkumulyatoridan samarali foydalanishga yordam beradi.
Rasmiy izohga ko‘ra, Super Power Saver rejimi Mi 11 Ultra’ning asosiy displeyini o‘chiradi. Bunda faqat orqa paneldagi qo‘shimcha displey ishlashni davom etadi. Uning funksionalligi, albatta, cheklangan: displey yordamida foydalanuvchi faqat vaqtni tekshirishi, qo‘ng‘iroqlarni qabul qilishi va favqulodda yordam uchun oldinroq o‘rnatilgan kontaktni chaqirishi mumkin.
Xiaomi’dagilarning ta’kidlashicha, Super Power Saver smartfonning 14 kungacha avtonom rejimda ishlashini ta’minlaydi. Shu bilan birga, kompaniya akkumulyatorlarning ishchanligi turli omillar sabab farqlanishi mumkinligini qayd etadi. Nima bo‘lganda ham, yangi funksiya elektr energiyasi uzoq vaqtga o‘chganda haqiqatan foyda beradi.
Avvalroq Xiaomi Mi 12 Ultra yangi Snapdragon 895 protsessori o‘rnatilgan birinchi smartfonga aylanishi, Xiaomi smartfon quvvatini 8 daqiqada to‘liq to‘ldirishga qodir quvvatlantirgichni taqdim etgani to‘g‘risida xabar berilgandi.
Izoh (0)