@Snoreyn niki ostida tanilgan italiyalik dizayner Juzeppe Spinelli LetsGoDigital resursi uchun Galaxy S21 FE smartfonining sifatli renderlarini tayyorladi, deb xabar beradi IXBT.
Samsung Galaxy S21 FE modeli S21 lineykasidagi boshqa smartfonlardan kameralar bloki orqa panel rangiga bo‘yalgani bilan ajralib turadi. 2020-yilda Samsung Galaxy S20 FE’ni Full HD sifatni qo‘llab-quvvatlaydigan ingichka displey va plastik orqa panel bilan jihozlagan edi. Aftidan, Galaxy S21 FE’da ham ushbu tajriba qo‘llanilgan.
Taxminlarga ko‘ra, yangi model o‘tgan yilgidan biroz kichikroq bo‘ladi. Qurilmaga 120 gertsi yangilanish chastotasiga ega Full HD+ sifatni qo‘llab-quvvatlovchi 6,4 dyuymga teng Super AMOLED-displey o‘rnatiladi. Displey o‘lchami bo‘yicha Galaxy S21 FE modeli S21 (6,2 dyuym) va S21+ (6,7 dyuym) o‘rtasidan joy oladi. Bundan tashqari, telefonning himoya darajasi IP68’ni tashkil etadi.
Ma’lum qilinishicha, Samsung AQShda Samsung Galaxy S21 FE’ning bir kristalli Snapdragon 888 bazasida yaratilgan versiyasini, boshqa bozorlarda esa Exynos 2100 tizimi o‘rnatilgan versiyasini sotadi. Smartfon ikki xil variantda taqdim etiladi — 6/128 GB hamda 8/258 GB.
Samsung Galaxy S21 FE Android 11 operatsion tizimida ishlaydi, akkumulyator sig‘imi 4500 mA/soat yetadi va 45 vattli tezkor quvvatlanish funksiyasiga ega bo‘ladi.
Shu bilan birga, yangi model 12 megapikselli keng burchakli, 12 megapikselli o‘ta keng burchakli va 8 megapikselli teleobyektivdan iborat uchtalik kameraga ega bo‘lishi kutilmoqda. Frontal kamerasi 32 megapiksellga yetadi.
So‘nggi ma’lumotlarga ko‘ra, Samsung o‘zining Galaxy S21 FE modelini 2021-yilning to‘rtinchi choragida taqdim etadi.
Avvalroq S Pen’ga ega Galaxy S21 Ultra o‘zini oqlamadi, shu sababli Samsung kompaniyasi Galaxy Note’ni qaytarishi, Samsung’ning buklanuvchan “garmoshka-planshet”i yangi tasvirlarda namoyish etilgani to‘g‘risida xabar berilgandi.
Izoh (0)