“Qora beva” filmi premyerasi avvalida Xiaomi Marvel Studios bilan reklama kampaniyasini ishga tushirib, Xiaomi Mi 11 filmning rasmiy smartfoniga aylanganini e’lon qildi, deb xabar beradi IXBT.

Reklama kampaniyasi bir vaqtning o‘zida Yevropaning yetti davlatida amalga oshirilmoqda, film premyerasi esa 9-iyul kuni bo‘lib o‘tadi. Shuningdek, Xiaomi Mi 11 smartfonining o‘ziga xosliklarini namoyish etuvchi yangi treyler ham e’lon qilingan.

Xiaomi Mi 11 smartfoniga AMOLED ekran o‘rnatilgan bo‘lib, u DispleyMate ekspertlari tomonidan yuqori baholangan. 2K sifatni va 120 gertsli yangilanish chastotasini qo‘llab-quvvatlovchi ekranning diagonali 6,81 dyuymni tashkil etadi. Smartfon bir kristalli Snapdragon 888 bazasida yaratilgan, tezkor xotirasi LPDDR 5. Qurilma 55 vattli simli va 50 vattli simsiz quvvatlanish, shuningdek, 10 vattli qayta simsiz quvvat uzatish funksiyasiga ega. Akkumulyator sig‘imi 4600 mA/soat.

Smartfonning 108 megapikselli asosiy kamerasiga optik barqarorlashtirgich o‘rnatilgan va qo‘shimcha 13 hamda 5 megapikselli kameralar ham mavjud.

Eslatib o‘tamiz, Skarlett Yoxansson ijrosidagi “Qora beva” filmining premyerasi 2020-yilning noyabrida bo‘lib o‘tishi kerak edi, biroq koronavirus pandemiyasi ushbu muddatning kechikishiga sabab bo‘lgan.