Dunyoda koronavirusga uchinchi marta chalinish holatlari qayd etilmoqda

Dunyoda koronavirusga uchinchi marta chalinish holatlari qayd etilmoqda va ushbu holda kasallik avvalgiga qaraganda og‘irroq kechishi mumkin. Bu haqda yuqumli kasalliklar bo‘yicha rossiyalik mutaxassis Yevgeniy Timakov aytib o‘tdi.

“Virus immunitet to‘siqlarini chetlab o‘tib, ikkinchi yoki uchinchi marta yuqadi. Ko‘pincha uchinchi marta kasallanish birinchi va ikkinchisidan ham og‘irroq bo‘ladi”, — dedi “Lider-tibbiyot” tibbiyot markazi bosh shifokori Timakov Rossiyadagi epidemiologik vaziyatga bag‘ishlangan matbuot anjumanida.

Timakov Rossiyada kasallanishning uchinchi to‘lqini bilan bog‘liq koronavirus “hindcha” (delta) shtammining o‘ziga xos xususiyatiga ishora qildi.

Uning so‘zlariga ko‘ra, virusni yuqtirgandan keyin yetti-sakkiz kun o‘tib, kasalxonaga yotqizish zarurati tug‘ilsa, bemorning ahvoli yomonlashishi mumkin.

Jahon sog‘liqni saqlash tashkiloti (JSST) rahbari Tedros Gebreyesus koronavirusning yangi shtammlari vaksinalar bilan kurashda g‘olib chiqayotganini aytdi.

“Hozirda dori-darmonlarni ishlab chiqarish va tarqatishdagi adolatsizlik sababli yangi variantlar vaksinalarga qarshi kurashda g‘olib chiqmoqda”, — dedi Gebreyesus.

Uning ta’kidlashicha, bu global iqtisodiyotni pandemiya tufayli yuzaga kelgan inqirozdan tiklashga xalal bermoqda. JSST rahbarining so‘zlariga ko‘ra, ko‘plab mamlakatlarda kasallanishning keskin o‘sishi vaksinalarni taqsimlashdagi tengsizlik va virusning doimiy mutatsiyaga uchrashi bilan to‘g‘ridan to‘g‘ri bog‘liq.

“Vaksina millatchiligi, uning asosiy ulushi bir nechta mamlakatlarga to‘g‘ri kelishi axloqiy jihatdan nomaqbuldir va virusga qarshi ijtimoiy sog‘liqni saqlash strategiyasini samarasiz qilmoqda. Aholisi yuqori darajada emlangan ayrim mamlakatlar go‘yo pandemiya tugagandek epidemiyaga qarshi choralardan voz kechmoqda”, — dedi tashkilot rahbari.

Gebreyesus dunyodagi millionlab sog‘liqni saqlash xodimlari hali ham emlanmaganidan “g‘azabda ekanini” aytdi. “Axloqiy, epidemiologik yoki iqtisodiy nuqtayi nazardan, dunyo ushbu pandemiyaga qarshi birgalikda kurashish uchun birlashadigan vaqt keldi”, — deya qo‘shimcha qildi u.

Avvalroq Gebreyesus koronavirusga qarshi kurashda erishilgan yutuqlarga qaramay, pandemiya juda xavfli bosqichda ekanini ta’kidlagan. JSST rahbari ushbu vaziyatdan chiqishning yagona yo‘li shaxsiy himoya vositalari, testlar, dorilar va vaksinalarni adolatli taqsimlash ekanini aytgan.