Litva noqonuniy muhojirlar oqimi tufayli Belarus bilan chegarada devor quradi

Litva bosh vaziri Ingrida Shimonite noqonuniy migrantlar oqimini cheklash uchun Belarus bilan chegarada qo‘shimcha to‘siq qurish rejasini e’lon qildi, deb yozadi Meduza.

“Biz Litva va Belarusni ajratib turadigan qo‘shimcha jismoniy to‘siq qurishni boshlaymiz, bu noqonuniy migrantlar oqimini uyushtiruvchilar uchun aniq belgi va to‘xtatuvchi vosita bo‘ladi”, — dedi hukumat rahbari matbuot anjumanida. Uning ta’kidlashicha, Litva hukumati chegarani qo‘riqlashni kuchaytirish uchun armiyani jalb qiladi.

Belarus bilan chegarada devor qurish rejalari 17-iyun kuni Litva ichki ishlar vaziri Agne Bilotayte tomonidan e’lon qilingan. Uning so‘zlariga ko‘ra, rasmiylar devor qurilishini “muhokama qilmoqda”. Ichki ishlar vazirligining aniqlik kiritishicha, ular turli xil variantlarni ko‘rib chiqmoqda — tikanli simlardan yoki signalizatsiyadan iborat bir yoki ikkita devor qurilishi mumkin.

Litva va Belarus o‘rtasidagi chegara uzunligi 678,8 kilometrni tashkil qiladi. Hozirda chegaraning 78 kilometrlik qismiga devor o‘rnatilgan. Taxminan 92,5 kilometr masofaga devor o‘rnatish mumkin emas, chunki u yerda chegara suv havzalari orqali o‘tadi. Shunday qilib, chegaraning 508 kilometr qismiga devor o‘rnatish kerak bo‘ladi.

Litva Ichki ishlar vazirligining ma’lumotlariga ko‘ra, bir kilometr devor o‘rnatish narxi 30 ming yevroni tashkil qilishi mumkin. “Bundan tashqari, devor bo‘ylab videokameralar, datchiklar va boshqalarni birlashtirish kerak. Chegaraning bir kilometri uchun ularni o‘rnatish 130 ming yevroga tushadi”, — deyiladi vazirlik xabarida.

Iyul oyi boshida Litva Belarusdan kelayotgan noqonuniy migrantlar oqimi tufayli favqulodda vaziyat rejimini e’lon qildi va chegara xavfsizligini kuchaytirdi. 2021-yil boshidan buyon Belarus hududi orqali, asosan, Yaqin Sharq va Afrika mamlakatlaridan 1400 dan ortiq muhojir Litvaga kirib kelgan. Litva hukumatining da’vo qilishicha, muhojirlar Belarusdan atayin Litva chegarasi tomon jo‘natilmoqda.

Belarusda 2020-yilgi prezident saylovlari va undan keyingi ommaviy norozilik va repressiyalardan so‘ng Belarus muxolifatining mamlakatni tark etgan ko‘plab tarafdorlari va yetakchilari Litvada yashaydi. Saylovlarda Aleksandr Lukashenkoning raqibi bo‘lgan Svetlana Tixanovskaya ham Litvada yashaydi.

May oyida Aleksandr Lukashenko Belarus Yevropa tomon noqonuniy migrantlar va giyohvand moddalar tranzitiga to‘sqinlik qilmasligini aytdi va buni Yevropa davlatlari Belarusga qarshi “gibrid urushni boshlagani” bilan izohladi.