Davlat statistika qo‘mitasi O‘zbekistonda 2021-yilning yanvar—iyun oylarida benzin narxi 17 foizga qimmatlashganini ma’lum qildi. Iyunda benzin respublika bo‘yicha o‘rtacha 2,5 foizga, propan esa 8,7 foizga qimmatlashgan.
Qo‘mita hisobotida keltirilishicha, 2021-yil boshidan narxlarning sezilarli oshishi benzin (17,0 foiz) hamda shaxsiy transport vositalariga texnik xizmat ko‘rsatish va ta’mirlash xizmatlari (8,2 foiz) narxlarida qayd etilgan. Yillik nisbatda esa inflyatsion jarayonlar benzin (38,9 foiz), shaxsiy transport vositalariga texnik xizmat ko‘rsatish va ta’mirlash xizmatlari hamda havo transportida yo‘lovchi tashish xizmatlari (18,8 foiz) narxlarida yaqqol namoyon bo‘lgan.
Eslatib o‘tamiz, 2020-yil 1-maydan boshlab Ai-80 markali avtomobil benzini va dizel yoqilg‘isi (shu jumladan, EKO markali dizel yoqilg‘isi) chakana narxlarini davlat tomonidan tartibga solish bekor qilindi. Shundan so‘ng 3-maydan boshlab Ai-80 benzinining narxi 500 so‘mga pasayib, bir litri 4000 so‘mdan sotila boshladi. 2020-yilning dekabrida mazkur markadagi benzinining o‘rtacha boshlang‘ich narxi 2,6 foizga ko‘tarilgandi. 2021-yilning yanvar oxirlarida Ai-80 benzini narxi 110 so‘mga qimmatlashgan, 2021-yilning fevralida ushbu benzin narxi qariyb 5 foizga oshgandi. Mart oyida 1,4 foizga pastlagan bo‘lsa, aprel oyida 0,2 foizga, may oyida 3 foizga yana oshgan. Toshkentda iyun oxirlarida eng xaridorgir Ai-80 markadagi benzin narxi 6000 so‘mga ko‘tarilgani ijtimoiy tarmoqlar foydalanuvchilari o‘rtasida qizg‘in muhokamalarga sabab bo‘lgandi.
Avvalroq “O‘zbekneftgaz” AYoQShlarda sotilayotgan sifatsiz benzin xorijda ishlab chiqarilganini ma’lum qilgandi. Shoxobchalarda sotilayotgan import avtobenzin va dizel yoqilg‘isi sifat ko‘rsatkichlari amaldagi me’yoriy hujjatlar bilan belgilab berilgan ko‘rsatkichlardan farq qilinishi, ya’ni sifat ko‘rsatkichlari talabga javob bermasligi aniqlangan edi. Keyinroq O‘zbekiston rasmiylarining bu boradagi fikri o‘zgarib, benzin sifatli, muammo uni sotayotgan mahalliy tadbirkorlarda ekani ta’kidlangandi.
Izoh (0)