Давлат статистика қўмитаси Ўзбекистонда 2021 йилнинг январь—июнь ойларида бензин нархи 17 фоизга қимматлашганини маълум қилди. Июнда бензин республика бўйича ўртача 2,5 фоизга, пропан эса 8,7 фоизга қимматлашган.
Қўмита ҳисоботида келтирилишича, 2021 йил бошидан нархларнинг сезиларли ошиши бензин (17,0 фоиз) ҳамда шахсий транспорт воситаларига техник хизмат кўрсатиш ва таъмирлаш хизматлари (8,2 фоиз) нархларида қайд этилган. Йиллик нисбатда эса инфляцион жараёнлар бензин (38,9 фоиз), шахсий транспорт воситаларига техник хизмат кўрсатиш ва таъмирлаш хизматлари ҳамда ҳаво транспортида йўловчи ташиш хизматлари (18,8 фоиз) нархларида яққол намоён бўлган.
Эслатиб ўтамиз, 2020 йил 1 майдан бошлаб Аи-80 маркали автомобиль бензини ва дизель ёқилғиси (шу жумладан, ЭКО маркали дизель ёқилғиси) чакана нархларини давлат томонидан тартибга солиш бекор қилинди. Шундан сўнг 3 майдан бошлаб Аи-80 бензинининг нархи 500 сўмга пасайиб, бир литри 4000 сўмдан сотила бошлади. 2020 йилнинг декабрида мазкур маркадаги бензинининг ўртача бошланғич нархи 2,6 фоизга кўтарилганди. 2021 йилнинг январь охирларида Аи-80 бензини нархи 110 сўмга қимматлашган, 2021 йилнинг февралида ушбу бензин нархи қарийб 5 фоизга ошганди. Март ойида 1,4 фоизга пастлаган бўлса, апрель ойида 0,2 фоизга, май ойида 3 фоизга яна ошган. Тошкентда июнь охирларида энг харидоргир Аи-80 маркадаги бензин нархи 6000 сўмга кўтарилгани ижтимоий тармоқлар фойдаланувчилари ўртасида қизғин муҳокамаларга сабаб бўлганди.
Аввалроқ «Ўзбекнефтгаз» АЁҚШларда сотилаётган сифатсиз бензин хорижда ишлаб чиқарилганини маълум қилганди. Шохобчаларда сотилаётган импорт автобензин ва дизель ёқилғиси сифат кўрсаткичлари амалдаги меъёрий ҳужжатлар билан белгилаб берилган кўрсаткичлардан фарқ қилиниши, яъни сифат кўрсаткичлари талабга жавоб бермаслиги аниқланган эди. Кейинроқ Ўзбекистон расмийларининг бу борадаги фикри ўзгариб, бензин сифатли, муаммо уни сотаётган маҳаллий тадбиркорларда экани таъкидланганди.
Изоҳ (0)