Afg‘oniston hukumati Rossiya bilan qurol-yarog‘ yetkazib berish bo‘yicha muzokaralar olib borayotgani yo‘q, deb yozadi “Kommersant” Afg‘oniston prezidentining milliy xavfsizlik bo‘yicha maslahatchisi Hamidulla Mohibga tayanib. Rasmiyning ta’kidlashicha, Moskva bilan hamkorlikni boshqa yo‘l bilan, xususan, axborot almashish orqali amalga oshirish mumkin.
“Yo‘q, biz bu borada harbiy qo‘llab-quvvatlash haqida gapirmayapmiz. Bizning maslahatlashuvlarimiz pozitsiyalarimizni bir-biriga yaqinlashtirish va ham Afg‘onistonga, ham butun mintaqaga bo‘layotgan tahdidlar to‘g‘risida umumiy tushunchani shakllantirishga qaratilgan”, — dedi Mohib “RIA Novosti”ga bergan intervyusida. Uning so‘zlariga ko‘ra, umumiy tushuncha “axborot almashinuvi, texnik imkoniyatlardan birga foydalanishdan iborat bo‘lishi mumkin”.
Maslahatchining so‘zlariga ko‘ra, AQSh qo‘shinlarining Afg‘onistondan olib chiqilishi, mamlakatga “texnik va siyosiy darajadagi o‘zaro ishonch va hamkorlik orqali har qanday tahdidlarga qarshi birgalikda kurashish uchun mintaqa bilan kuchlarni birlashtirish imkoniyatlarini ochadi”.
AQShning harakatlari, shuningdek, barcha kuchlarning yangi hukumatda ishtirok etishini ta’minlashga yordam beradi, deya ta’kidladi Mohib.
Afg‘onistondan AQSh va NATO qo‘shinlarini olib chiqish 29-aprelda boshlangan. AQSh qo‘shinlarini olib chiqish amaliyoti avgust oxiriga qadar tugashini ma’lum qildi. Ayni paytda AQSh davlat kotibi Entoni Blinken Afg‘onistondan AQSh qo‘shinlari chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmagandi.
Avvalroq AQSh rasmiylari O‘zbekiston, Qozog‘iston va Tojikistonga AQSh harbiylariga yordam bergan afg‘onlarni vaqtincha qabul qilishni so‘rab murojaat qilgani haqida xabar berilgandi. Ta’kidlanishicha, mazkur fuqarolar AQSh harbiylari chiqib ketgach “Tolibon”ning repressiyalaridan qo‘rqmoqda. Shu bilan birga Afg‘oniston hukumati AQSh qo‘shinlari olib ketilganidan olti oy o‘tgach qulashi mumkinligi xabar qilindi.
Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunladi.
Izoh (0)