Yevropada bir martalik plastik idishlardan foydalanish qat’iyan taqiqlandi. Bu haqda Yevrokomissiya, shuningdek, Yevropaning atrof-muhit bo‘yicha komissari o‘z Twitter sahifalarida ma’lum qilgan, deb yozadi Euronews.
2019-yilda qabul qilingan tegishli qonunga ko‘ra, Yevropa Ittifoqi davlatlari bunday mahsulotlarni bozordan olib tashlashi hamda 2021-yil 3-iyulga qadar ularni ishlab chiqarishni to‘xtatishi kerak edi. 12 oy ichida mavjud zaxiralarni sotishga ruxsat beriladi, ammo shundan keyin taqiq to‘liq kuchga kiradi.
Yevropa parlamentining belgiyalik a’zosi Frederik Ris qonun barcha plastik idishlarga taalluqli ekanini ta’kidladi: bunga plastik likopchalar, pichoqlar, sanchqilar kiradi. Havo shari tutqichlari, paxtaqand tayoqchalari va kofe aralashtirgichlarni ishlab chiqarish ham taqiqlanadi.
“Bundan tashqari hammaga ma’lum okso-parchalanuvchi polietilen paketlar ham — bu biroz murakkab so‘z, ular qanday parchalanishi haqida aytish osonroq. Ular okeanda zaharli shilimshiqni hosil qiladi. Bir martalik plastiklar, shu jumladan, asosan, fast-fudlarda oziq-ovqat va ichimliklar uchun foydalaniladigan ko‘pikli polistirol idishlarning parchalanishi ham shunday kechadi”, — dedi u.
Dengiz va okeanlarni ifloslantiradigan chiqindilarning 80 foizdan ortig‘i plastikdan iborat. Undan tayyorlangan mahsulotlar ko‘pincha faqat bir marta ishlatiladi va keyin tashlab yuboriladi. Qayta foydalanish mumkin bo‘lgan mahsulotlarga qaraganda ular dengizlarga to‘kilish ehtimoli ko‘proq. Dengizlarda, okeanlarda va plyajlarda to‘plangan plastik dengiz hayoti va inson salomatligi uchun katta xavf tug‘diradi.
Izoh (0)