Jons Hopkins universiteti ma’lumotlariga qaraganda, dunyoda COVID-19’ga chalinganlar soni 183 794 396 kishiga yetdi. Vafot etganlar soni 3 977 172 tani tashkil qilmoqda. Kasallanish holatlarining ko‘pligi bo‘yicha AQSh (33,7 million), Hindiston (30,5 million), Braziliya (18,7 million), Fransiya (5,8 million) va Rossiya (5,5 million) eng oldinda bormoqda.
2021-yilgi AQSh Mustaqillik kuni (4-iyul) shunisi bilan ahamiyatli bo‘ldiki, mamlakat koronavirus pandemiyasidan keyin normal hayotga qaytishni boshladi. Bu haqda AQSh prezidenti Jo Bayden aytib o‘tdi.
“Bu yil 4-iyul — nishonlash uchun o‘ziga xos kun, chunki biz qorong‘ilikdan… pandemiya va izolyatsiyadan, og‘riqdan, qo‘rquv va talafotlardan chiqyapmiz”, — dedi Bayden Oq uydagi bayram ziyofati chog‘ida.
Virus uzil-kesil mag‘lubiyatga uchramagan bo‘lsa-da, u endi hayotlarimizni boshqarmayapti va mamlakatimizni falajlab qo‘ymayapti, dedi prezident. “Bu halokatli virus ustidan g‘alaba qozondik deb aytishga bugun biz har qachongidan ham yaqinroq turibmiz”, — dedi u.
Buning tasdig‘i sifatida Bayden mamlakatda ishchi o‘rinlari ko‘payayotgani, korxonalar faoliyati qayta tiklanayotgani, iqtisodiyot o‘sayotganini aytib o‘tdi.
Fransiyada ketma-ket besh kundan buyon koronavirusga chalinish holatlarining ko‘payishi kuzatilmoqda. Bu juda yuqumli bo‘lgan delta variant bilan bog‘liqdir.Mamlakat sog‘liqni saqlash vaziri Olivye Veran aytishicha, koronavirusning yangi to‘lqini iyul oxiridayoq yuz berishi mumkin. Shu sababli u to‘lqinning oqibatlarini yumshatish uchun fuqarolarni cheklov choralariga rioya qilishga, emlanishga va infeksiyaga nisbatan test topshirishga chaqirdi.
“Vaksinatsiyadan keyin biz kamroq kasallanamiz, virusni ancha kam tashiymiz va boshqa stress sharoitida yashamaymiz. Jamoaviy immunitetga erishish — bu jamoaviy chaqiriq, kelinglar, buni birgalikda qilamiz!” — dedi vazir.
Lyuksemburg bosh vaziri Ksavye Bettel koronavirus tashxisi bilan kasalxonaga yotqizildi, virus unda Yevroittifoqning 24—25-iyun kunlari bo‘lib o‘tgan sammitidan keyin aniqlandi.Bettelning COVID-19’ni yuqtirgani 27-iyun kuni ma’lum bo‘ldi. U COVID-19’ga topshirgan ikkala test ham musbat natija bergan. Mamlakat Sog‘liqni saqlash vazirligi tavsiyalariga muvofiq, Bettel o‘z-o‘zini yakkalash rejimiga o‘tdi.
Bosh vazir 6-may kuni AstraZeneca vaksinasining birinchi komponentini qabul qilgan edi. Yevroittifoq sammiti chog‘ida u barcha ehtiyot choralariga rioya qilgan, uchrashuvning birorta ham ishtirokchisi u yaqindan muloqot qilgan odamlar ro‘yxatiga kirmagan.
Eron hukumati mamlakatda koronavirusning delta shtammi tarqalishi munosabati bilan bir qator cheklov choralarini qayta tiklamoqda.Xususan, koronavirus tarqalishi ancha jiddiy bo‘lgan hamda COVID-19 xavfi yuqori bo‘lgan hududlarda birinchi darajali ahamiyatga ega bo‘lmagan tijorat korxonalari yopiladi. 275 ta shaharda, shu jumladan, Tehronda barcha jamoat bog‘lari, restoranlar, qandolatxonalar, go‘zallik salonlari, savdo markazlari, kitob do‘konlari ham yopiladi.
Shuningdek, kasallanish darajasi yuqori bo‘lgan shaharlararo ko‘chib yurish taqiqlandi.
Izoh (0)