Qozog‘istonda An-2 rusumli samolyot halokatga uchradi, deb yozadi Tengrinews Favqulodda vaziyatlar vazirligiga tayanib.
Hodisa mahalliy vaqt bilan, taxminan, soat 07:00 da (Toshkent vaqti bilan bir xil) Qizilo‘rda viloyatining Qorovultepa qishlog‘idan 12 kilometr masofada yuz bergan. Samolyot sholi dalalariga ishlov berayotgan edi.
“Samolyot uchib chiqqanidan keyin bir necha kilometr masofani bosib o‘tib, texnik nosozliklar tufayli majburiy qo‘nish chog‘ida to‘g‘ri dalaga qulab tushdi”, — deyiladi FVV xabarida.
Samolyot bortida 1954 va 1967-yillarda tug‘ilgan ikki uchuvchi bo‘lgan. Ularning ikkalasi ham kasalxonaga yotqizilgan. Dastlabki ma’lumotga ko‘ra, ularning ahvoli qoniqarli deb baholanmoqda.
Eslatib o‘tamiz, mart oyida Qozog‘istonning Olmaota shahri aeroporti yaqinida An-26 samolyoti qulab tushgan, samolyotda olti kishi bo‘lib, ulardan to‘rt nafari vafot etgan edi.
Izoh (0)