Kanadaning Britaniya Kolumbiyasida chaqmoq urishi tufayli sodir bo‘lgan 136 ga yaqin o‘rmon yong‘inlari qayd etildi. Bu haqda provinsiyaning o‘rmon yong‘inlarini o‘chirish xizmati ma’lumotlariga tayanib, BBC News xabar berdi.
Kanadada bir necha kun davom etgan rekord darajadagi issiqlikdan so‘ng 12 mingga yaqin chaqmoq urish holati kuzatilgan. Kanada Federal hukumati Britaniya Kolumbiyasining favqulodda xizmatlariga yong‘inlarga qarshi kurashishda yordam berish uchun harbiy samolyotlar yuborishni va’da qilgan.
Ushbu hafta boshida provinsiyaning Litton shaharchasida yashovchi odamlar o‘z uylarini tark etishga majbur bo‘ldi. Shaharchada 29-iyun kuni Kanada tarixidagi eng yuqori havo harorati — selsiy bo‘yicha 49,6 daraja qayd etildi, keyinchalik hudud yong‘inlardan vayron bo‘ldi. Yong‘inlar bir qator magistral yo‘llarni ikkala yo‘nalishda ham to‘sib qo‘ydi.
Jamoat xavfsizligi vaziri Bill Blerning aytishicha, ob-havo va yong‘inlar Britaniya Kolumbiyasiga “halokatli” va “misli ko‘rilmagan” ta’sir ko‘rsatmoqda. Britaniya Kolumbiyasining o‘rmon yong‘inlarini o‘chirish xizmati hafta oxirida kutilayotgan yangi o‘rmon yong‘inlariga tayyorgarlik ko‘rayotganini ma’lum qildi.
Eslatib o‘tamiz, Kanadada yuqori havo harorati 85 yillik rekordni yangilagani, anomal issiq havo oqibatida 200 dan ortiq odam halok bo‘lgani, keyinchalik issiq havo qurbonlarining soni 500 kishidan oshgani haqida xabarlar berilgandi.
Izoh (0)