Bugun,

  • USD 11095.31
  • RUB 173.84
  • EUR 10772.44

Qozog‘istonning Olmaota shahri aeroporti yaqinida An-26 samolyoti qulab tushdi. Bu haqda aeroport matbuot xizmatiga asoslanib “TASS” xabar berdi.

Foto: “Sputnik.kz”

Foto: “Sputnik.kz”

“Nur-Sulton– Olmaota yo‘nalishida uchib kelayotgan An-26 samolyoti bilan aloqa 13-mart soat 17:20 da (Toshkent vaqti bilan 16:20) Olmaota aeroportiga yaqinlashganda uzilib qoldi. Zudlik bilan trevoga e’lon qilindi va aeroportning favqulodda xizmatlari voqea joyiga yo‘l oldi. Dastlabki ma’lumotlarga ko‘ra, samolyot uchish-qo‘nish yo‘lagi oxirida qulab tushgan”, – deyiladi matbuot xizmatining Facebook’dagi rasmiy sahifasida.

Kazinform agentligining xabar berishicha, dastlabki ma’lumotlarga ko‘ra samolyotda olti kishi bo‘lgan, ulardan to‘rt nafari vafot etgan, ikki kishi kasalxonaga yotqizilgan.

Qozog‘iston Favqulodda vaziyatlar vazirligi ham to‘rt kishi halok bo‘lganini, ikki kishi yaralanganini xabar qilgan. “Dastlabki ma’lumotlarga ko‘ra, to‘rt kishi halok bo‘ldi, ikki kishi yarador bo‘lib, Ili viloyatidagi eng yaqin kasalxonaga jo‘natildi”, — deyiladi vazirlik bayonotida.

Favqulodda vaziyatlar vazirligi ma’lumotlariga ko‘ra, halokat bo‘lgan joyda Olmaota shahar sog‘liqni saqlash boshqarmasining 10 ta reanimatsion tez yordam guruhlari, yong‘in bo‘limi ekipajlari va qutqaruvchilar ishlamoqda.

Ta’kidlanishicha, samolyotda yuzaga kelgan yong‘in o‘chirilgan.

Qozog‘iston prezidenti Qosim-Jo‘mart To‘qayev halok bo‘lganlarning oila a’zolari va yaqinlariga hamdardlik bildirgan va tabiiy ofat sabablarini tekshirishni boshlashga ko‘rsatma bergan.

“Olmaota aeroportidagi aviahalokat paytida halok bo‘lgan askarlarning oila a’zolari va yaqinlariga hamdardlik bildiraman. Jabrlanganlarga tezroq sog‘ayib ketishini tilayman. Mening ko‘rsatmalarim bilan aviahalokat sabablarini aniqlash ishlari boshlandi. Bunday hodisalar takrorlanmasligi kerak”, – deb yozdi To‘qayev Twitter’da.

Olmaota hokimi Baqitjan Sagintayev ham An-26 samolyoti qulagan joyga jo‘nab ketganini ma’lum qilgan va halok bo‘lganlarning oila a’zolariga hamdardlik bildirgan.

“Men tegishli xizmatlarga voqea oqibatlarini bartaraf etishni topshirdim. Qurbonlarning oila a’zolari va yaqinlariga hamdardlik bildiraman. Jabrlanganlarga barcha kerakli tibbiy yordam ko‘rsatilmoqda”, – deydi shahar hokimi.

Bundan avval Fransiyada vertolyot halokati oqibatida milliarder va siyosatchi Olivye Dasso halok bo‘lgani, Hindistonda avtobus kanalga qulashi oqibatida 40 kishi halok bo‘lgani hamda AQShda harbiy vertolyot qulashi oqibatida uch kishi halok bo‘lgani haqida xabar berilgandi.

2019-yil 27-dekabrda Qozog‘istonda Bek Air aviakompaniyasining samolyoti halokatga uchragan. Layner bortida besh nafar ekipaj a’zosi, 93 nafar yo‘lovchi, jumladan, 89 nafar Qozog‘iston fuqarolari, ikki nafar Ukraina, bir nafar Qirg‘iziston va bir nafar Xitoy fuqarosi bo‘lgan. O‘shanda O‘zbekiston tashqi ishlar vazirligi halok bo‘lganlar orasida o‘zbekistonliklar yo‘qligini bildirgan. Aviahalokat oqibatida 15 nafar odam, xususan, samolyot komandiri halok bo‘lgandi. Rasmiy manbalar aviahalokat qurbonlari sonining 12 nafar ekanini ma’lum qilgan. Olmaotadagi turli tibbiyot muassasalariga jami 49 nafar odam yotqizilgandi. Aviahalokat sababli 28-dekabr milliy motam kuni deb e’lon qilingandi.

Shuningdek, 2020-yil aprel oyida Qozog‘istonda, Qarag‘anda yaqinida, MiG-31 samolyoti halokatga uchragan. Samolyot aeroport hududiga qulagan, ekipaj a’zolariga talafot yetmagandi.

Izoh
Asosiy yangiliklar
Dunyo
Britaniya hukumati “Vagner”ni terrorchi tashkilot deb e’lon qilmoqchi — The Telegraph
Dunyo
AQSHda xavfli moddalarni olib ketayotgan yuk poyezdi relsdan chiqib ketdi (video)
Mahalliy
O‘zbekistonda kelayotgan hafta boshida qanday ob-havo bo‘ladi?