Jahon meteorologiya tashkiloti (JMT) Antarktida qit’asida rekord darajadagi yuqori harorat ko‘rsatkichini tan oldi.
Qit’ada rekord darajadagi issiqlik — Selsiy bo‘yicha 18,3 daraja havo harorati 2020-yil 6-fevralda qayd etilgan, ammo shu paytga qadar mavjud ma’lumotlarni tekshirish va taqqoslash jarayoni davom etayotgan edi. Rekord harorat ko‘rsatkichi Antarktika yarimorolidagi Argentinaning Esperansa tadqiqot stansiyasida aniqlangan.
Antarktida qit’asi uchun avvalgi tasdiqlangan rekord 17,5 daraja edi, ushbu harorat ham Esperansada, 2015-yilda qayd etilgan.
“Mazkur maksimal havo haroratini tekshirish juda muhim, chunki bu bizga Yerning chekka qirralaridan biridagi ob-havo va iqlim tasvirini yaratishda yordam beradi. Antarktika yarimoroli sayyoramizning isish jarayoni eng tez kechayotgan mintaqalaridan biri bo‘lib, so‘nggi 50 yil ichida havo harorati deyarli 3 darajaga oshgan”, — deya izohladi JMT bosh kotibi professor Petteri Taalas.
Shuningdek, JMT 2020-yil 9-fevral kuni Seymur orolidagi abadiy muzliklarni kuzatuvchi Braziliya stansiyasida 20,75 darajadagi rekord harorat ko‘rsatkichi aniqlangani haqidagi ma’lumotlarni rasman rad etdi. Ma’lumotlar va meta-ma’lumotlarning batafsil tahlili shuni ko‘rsatdiki, improvizatsiya qilingan radiatsiya himoyasi harorat datchiklari uchun termal xatolikka olib kelgan.
Mavzuga doir:
Izoh (0)