Suvaysh kanalini to‘sib qo‘ygan Ever Given kemasining egasi tovon to‘laydigan bo‘ldi

Mart oyida Suvaysh kanalini qariyb bir haftaga to‘sib qo‘ygan Ever Given konteyner kemasining egasi 540 million dollarlik zararni qoplab beradi. Bu haqda TNG News xabar berdi.

Suvaysh kanali ma’muriyati rahbari Usama Rabiyining aytishicha, kanal ma’muriyati sudga murojaat qilmasdan barcha tomonlarning manfaatlarini himoya qilish maqsadida kema ishini 12 kun davomida ko‘rib chiqqan. Natijada ikki tomon “prinsipial kelishuv”ni imzolagan, unga, xususan, tomonlarning har qanday shikoyatlardan voz kechishi kiradi.

Ta’kidlanishicha, kelishuv Suvaysh kanali rahbariyati kompaniyaga nisbatan da’vo miqdorini 916 million dollardan 540 million dollarga kamaytirgandan so‘ng imzolangan.

Shuningdek, kelishuvda kanalni qayta jihozlash, shu qatorda yangi buksir uskunalarini sotib olish ham ko‘zda tutilgan. Konteyner kemasining egasi Yaponiyaning Shui Kesen kompaniyasi hisoblanadi.

Eslatib o‘tamiz, 23-mart kuni Ever Given kemasi kuchli shamol va qum bo‘roni tufayli yo‘nalishini o‘zgartirib, burun va quyruq qismlari bilan ikkala qirg‘oqqa tiralib qolib, Suvaysh kanalining bir magistralli janubiy qismini to‘sib qo‘ygan edi. Buning natijasida 450 dan ortiq kemadan iborat tirbandlik yuzaga kelgan. Shuningdek, hodisa ortidan neft narxi keskin o‘sgan.

Suvaysh kanali orqali ikki yo‘nalishda ham kemalar harakati 29-mart, dushanba oqshomidan qayta tiklandi.

Avvalroq Suvaysh kanalining to‘silib qolishi oqibatida yetgan zarar 1 milliard dollarga baholangani haqida xabar berilgandi. Kanal ma’muriyati bo‘lib o‘tgan hodisada Ever Given kemasi kapitanini aybdor deb atadi. Kemaning egasi esa ishni sudga oshirmaslik uchun zararni qoplab bermoqchiligini ma’lum qildi.