Yaponiyaning Sidzuoka prefekturasida 3-iyul kuni ertalab sodir bo‘lgan ulkan ko‘chki tufayli taxminan 20 kishi bedarak yo‘qoldi. Bu haqda Kyodo agentligiga tayanib, “Kommersant” xabar berdi.

Xabarga ko‘ra, Yaponiyada bir necha kundan beri kuchli yomg‘ir yog‘moqda, bu esa ko‘chkilar va toshqinlarni keltirib chiqardi. Prefekturadagi Atami shahrida mahalliy vaqt bilan soat 10:30 (Toshkent vaqti bilan 07:30) da yirik ko‘chki sodir bo‘lgan. Tabiiy ofat natijasida bir nechta uylar buzilib, shahar infratuzilmasiga zarar yetgan.

Prefektura hukumati tabiiy ofatni bartaraf etishda hamda bedarak ketgan odamlarni topishda yordam so‘rab Yaponiyaning o‘zini-o‘zi muhofaza qilish kuchlariga murojaat qildi.

Yaponiya bosh vaziri Yosixide Suga tabiiy ofatlar bo‘yicha harakatlarni boshqarish vaziri Yasufumi Tanaxasi bilan uchrashuv o‘tkazdi. Bundan tashqari, bosh vazirning qarorgohida tabiiy ofat oqibatlarini bartaraf etish bo‘yicha shtab tashkil etildi. Suga odamlarning xavfsizligini ta’minlash uchun barcha choralarni ko‘rish zarurligi to‘g‘risida gapirdi.

Avvalroq Indoneziya va Sharqiy Timordagi ko‘chki va toshqinlar oqibatida 52 kishi halok bo‘lgani, Buyuk Britaniyada ham ulkan ko‘chki sodir bo‘lgani, Pokistonda yo‘lovchi avtobusi ko‘chki ostida qolib, oqibatda 16 kishi halok bo‘lgani haqida xabarlar berilgandi.