O‘zbekiston IIV Huquqiy statistika va tezkor-hisob ma’lumotlar markazining eJarima.uz veb-sayti hamda rasmiy bot kanali hozirda yangi platformaga o‘tkazilayotgani sababli faoliyati vaqtincha to‘xtatildi. Bu haqda “Daryo”ga IIV YHXBB matbuot xizmati xabar berdi.
Qayd etilishicha, hozirgi paytda ushbu dasturiy ta’minot yangi platformada ishga tushirilgan “E-ma’muriy ish” tizimi bilan integratsiya qilinmoqda. Integratsiya jarayonining yakunlanishi 2021-yilning 1-avgustiga qadar rejalashtirilgan bo‘lib, texnik ishlar amalga oshirilgandan so‘ng eJarima.uz veb-sayti hamda rasmiy bot kanali ishga tushiriladi.
Hozirgi kunda fuqarolarga qulayliklar yaratish maqsadida yangi “Road24.uz” mobil ilova tizimi yaratilgan bo‘lib, ushbu tizimni uyali aloqa vositasiga yuklab olib, unga ulangan holda barcha yo‘l harakati qoidabuzarliklari bo‘yicha ma’lumotlarni olish, to‘lash imkoniyati mavjud. Fuqarolar yangi qoidabuzarlik sodir etsa, uyali aloqa vositasiga “push” xabar keladi va 30 foizlik chegirma bilan to‘lash imkoniyatiga ega bo‘ladi.
Shuningdek, fuqarolar yo‘l harakati qoidalari va yo‘l harakati bo‘yicha boshqa o‘zlarini qiziqtirgan savollarni ham ushbu yangi tizim orqali bilib olish imkoniyatiga ega.
Bundan tashqari, jismoniy va yuridik shaxslarning avtotransport vositalariga o‘rnatilgan videoregistratorlar, shuningdek, videokuzatuv va tasvirga olish texnika vositalari hamda mobil qurilma orqali qayd etilgan huquqbuzarlik holatlari bo‘yicha dyhxx.ejarima.uz tizimi ham o‘z faoliyatini olib borayotganligi ma’lum qilingan.
Eslatib o‘tamiz, O‘zbekistonda yo‘l harakati qoidalari buzilgani haqidagi videolarni jo‘natish uchun maxsus sayt 2019-yilning iyulida ishga tushirilgan edi. Videoyozuvni jo‘natgan shaxs qoidabuzardan undirilgan jarima hisobidan eng kam ish haqining 5 foizi miqdorida (hozirda — 10,1 ming so‘m) mukofotga ega bo‘lishi mumkin.
Mamlakatda 2021-yil 1-yanvardan boshlab videoregistratorlar bilan birga, videokuzatuv va tasvirga olish texnika vositalari hamda mobil qurilmalar orqali qayd etilgan huquqbuzarlik holatlari aks etgan videoyozuvlar maxsus avtomatlashtirilgan foto va video qayd etish texnika vositalari orqali qayd etilgan videoyozuvlarga tenglashtirildi hamda Ma’muriy javobgarlik to‘g‘risidagi kodeksda belgilangan tartibda ko‘rib chiqiladi.
Izoh (0)