So‘nggi kunlarda O‘zbekistonda iyul oyining boshi uchun me’yoriy qiymatlardan 4-6 darajaga yuqori bo‘lgan anomal issiq ob-havo kuzatilmoqda. Bu hodisa Eron hududlaridan quruq va issiq havo oqimlarining kirib kelishi bilan bog‘liqdir, deb yozmoqda “O‘zgidromet”.
2-iyul, juma kuni respublikamizning ko‘pchilik viloyatlarida quruq va kam bulutli ob-havo kuzatiladi, faqat Andijon, Namangan, Farg‘ona viloyatlarida kunning ikkinchi yarmida, Toshkent viloyatida kechga tomon qisqa muddatli yomg‘ir yog‘ishi, momaqaldiroq bo‘lishi ehtimoli bor. Ba’zi joylarda shamolning tezligi 15-20 metr/sekundgacha kuchayishi mumkin.
Dam olish kunlarida esa issiq va quruq ob-havo sharoiti saqlanib qoladi, havo harorati kechalari 24-27 daraja, kunduz kunlari 38-41 daraja, shimolda, janubda va cho‘l hududlarda ba’zi joylarda 44 darajagacha issiq atrofida bo‘ladi. Shamolning 15-20 metr/sekund tezlikkacha kuchayishi saqlanib qoladi.
Respublikaning ayrim tog‘li hududlarida kunning ikkinchi yarmida momaqaldiroq bilan qisqa muddatli yomg‘ir yog‘ishi ehtimoli bor.
Eslatib o‘tamiz, “O‘zgidromet” hafta davomida yana issiq va quruq ob-havo bo‘lishini ma’lum qilgandi, kelasi hafta esa 46 darajagacha issiq bo‘lishi kutilmoqda.
Izoh (0)