Ўзбекистон ИИВ Ҳуқуқий статистика ва тезкор-ҳисоб маълумотлар марказининг eJarima.uz веб-сайти ҳамда расмий бот канали ҳозирда янги платформага ўтказилаётгани сабабли фаолияти вақтинча тўхтатилди. Бу ҳақда «Дарё»га ИИВ ЙҲХББ матбуот хизмати хабар берди.
Қайд этилишича, ҳозирги пайтда ушбу дастурий таъминот янги платформада ишга туширилган «E-ma’muriy ish» тизими билан интеграция қилинмоқда. Интеграция жараёнининг якунланиши 2021 йилнинг 1 августига қадар режалаштирилган бўлиб, техник ишлар амалга оширилгандан сўнг eJarima.uz веб-сайти ҳамда расмий бот канали ишга туширилади.
Ҳозирги кунда фуқароларга қулайликлар яратиш мақсадида янги «Road24.uz» мобил илова тизими яратилган бўлиб, ушбу тизимни уяли алоқа воситасига юклаб олиб, унга уланган ҳолда барча йўл ҳаракати қоидабузарликлари бўйича маълумотларни олиш, тўлаш имконияти мавжуд. Фуқаролар янги қоидабузарлик содир этса, уяли алоқа воситасига «push» хабар келади ва 30 фоизлик чегирма билан тўлаш имкониятига эга бўлади.
Шунингдек, фуқаролар йўл ҳаракати қоидалари ва йўл ҳаракати бўйича бошқа ўзларини қизиқтирган саволларни ҳам ушбу янги тизим орқали билиб олиш имкониятига эга.
Бундан ташқари, жисмоний ва юридик шахсларнинг автотранспорт воситаларига ўрнатилган видеорегистраторлар, шунингдек, видеокузатув ва тасвирга олиш техника воситалари ҳамда мобил қурилма орқали қайд этилган ҳуқуқбузарлик ҳолатлари бўйича dyhxx.ejarima.uz тизими ҳам ўз фаолиятини олиб бораётганлиги маълум қилинган.
Эслатиб ўтамиз, Ўзбекистонда йўл ҳаракати қоидалари бузилгани ҳақидаги видеоларни жўнатиш учун махсус сайт 2019 йилнинг июлида ишга туширилган эди. Видеоёзувни жўнатган шахс қоидабузардан ундирилган жарима ҳисобидан энг кам иш ҳақининг 5 фоизи миқдорида (ҳозирда — 10,1 минг сўм) мукофотга эга бўлиши мумкин.
Мамлакатда 2021 йил 1 январдан бошлаб видеорегистраторлар билан бирга, видеокузатув ва тасвирга олиш техника воситалари ҳамда мобил қурилмалар орқали қайд этилган ҳуқуқбузарлик ҳолатлари акс этган видеоёзувлар махсус автоматлаштирилган фото ва видео қайд этиш техника воситалари орқали қайд этилган видеоёзувларга тенглаштирилди ҳамда Маъмурий жавобгарлик тўғрисидаги кодексда белгиланган тартибда кўриб чиқилади.
Изоҳ (0)