O‘zbekiston odam savdosi va majburiy mehnatga qarshi kurashish bo‘yicha AQShning 2021-yilgi hisobotida 2-guruh maxsus kuzatuv ro‘yxatidan 2-kuzatuv ro‘yxatiga ko‘tarildi.
2021-yilgi hisobotda O‘zbekiston hukumatining paxta yig‘im-terimida majburiy mehnatning oldini olish, majburiy mehnatga qarshi qonunlar buzilishini aniqlash hamda qonunbuzarlarni javobgarlikka tortishga oid sa’y-harakatlari e’tirof etilgan.
Qayd etilishicha, 2020-yilda mehnatni nazorat qilish, huquqni muhofaza etish va faoliyati odam savdosiga yo‘naltirilgan fuqarolik jamiyati institutlari kuchaytirilgan. Shuningdek, fuqarolar ham majburlashga qarshi turish va turli huquqbuzarliklar to‘g‘risida xabar berish huquqlaridan tobora boxabar bo‘lib bormoqda.
“Shu kabi muhim yangiliklar Davlat departamentining O‘zbekiston reytingini ko‘tarish to‘g‘risidagi qaroriga asos bo‘ldi. Shuningdek, AQSh majburiy mehnatga barham berish va odam savdosiga qarshi kurashishda O‘zbekistonning sodiq hamkori bo‘lib qoladi”, — deyiladi xabarda.
Avvalroq Cotton Campaign xalqaro koalitsiyasi o‘zining rasmiy veb-saytida “O‘zbek paxtachiligida o‘zgarayotgan manzara” sarlavhali maqola chop etib, O‘zbekiston 2020-yilgi paxta terimida majburiy mehnatga barham berishda “sezilarli yutuqlar”ga erishganini ma’lum qilgandi.
Ma’lumot uchun, uzoq yillar davomida paxta terimi mavsumida bolalar va majburiy mehnatdan foydalanilgani bois O‘zbekiston paxtasi xalqaro jamoatchilik tomonidan “qora ro‘yxatlar”ga kiritilgan, yetakchi ishlab chiqaruvchilar O‘zbekiston paxtasini boykot qilgan edi. Xalqaro mehnat tashkilotining Vashingtondagi ofisi direktori Kevin Kassidi esa o‘zbek paxtasi boykotini asossiz deb e’lon qilgandi.
Izoh (0)