O‘zbekiston va Xitoy mamlakatda vaksina ishlab chiqarishni yo‘lga qo‘yish loyihasini tezlashtirishni rejalashtirmoqda, deb xabar beradi Innovatsion rivojlanish vazirligi.
1-iyul kuni innovatsion rivojlanish vaziri Ibrohim Abdurahmonov Xitoyning O‘zbekistondagi elchisi Szyan Yan bilan telefon orqali muloqot qilgan.
Suhbat davomida tomonlar O‘zbekiston hududida koronavirusga qarshi vaksina ishlab chiqarishni yo‘lga qo‘yish masalasini muhokama qilgan. Ibrohim Abdurahmonov ushbu yo‘nalishda Xitoyning Anhui Zhifei Longcom kompaniyasi bilan muzokaralar olib borilayotganini hamda ushbu kompaniya vakillarining ishlab chiqarish infratuzilmasi bilan tanishish uchun O‘zbekistonga tashrif buyurishi kutilayotganini ma’lum qilgan. O‘z o‘rnida, Xitoy elchixonasidan ushbu loyihani amalga oshirishni jadallashtirish bo‘yicha fikr almashilgan.
“Shu bilan birga, innovatsion rivojlanish vaziri elchi xonimdan Navoiy viloyatida dorivor moddalarni sintez qilish bo‘yicha O‘zbekiston—Xitoy tibbiyot texnologiyalari parkini yaratish loyihasini tezlashtirish bo‘yicha amaliy ko‘mak ko‘rsatishni so‘radi. Loyiha 10 million dollar miqdorida Xitoy tomonidan investitsiya kiritilishini ko‘zda tutgan bo‘lib, hozirda ushbu moliyaviy mablag‘larning kiritilishida va qurilish ishlarini boshlashda kechikishlar yuzaga kelmoqda”, — deyiladi xabarda.
Elchi Szyan Yan vazir tomonidan berilgan takliflarni o‘rganib chiqishini va tomonlar tez orada ushbu yo‘nalishlarda ijobiy natijalarga erishishiga ishonch bildirgan.
Eslatib o‘tamiz, fevral oyida O‘zbekiston Xitoyning Zhifei Longcom Biopharmaceutical kompaniyasi tomonidan yaratilgan ZF 2001 vaksinasining hammuallifi sifatida tan olingani haqida xabar berilgan edi. Xitoy kompaniyasi mazkur vaksinani hamkorlikda ishlab chiqarish uchun O‘zbekistonda faoliyat yuritayotgan bir qator farmatsevtika korxonalari faoliyatini o‘rganib, laboratoriya hamda texnik va ishlab chiqarish quvvatlarini inobatga olib, Jurabek Laboratories MChJ qo‘shma korxonasini tanlagan.
Izoh (0)