Eron Atom energiyasi bo‘yicha xalqaro agentlikka (MAGATE) o‘z yadro obyektlari haqida axborot berishni to‘xtatadi. Bu haqda Eron parlamenti spikeri Muhammad Galibaf ma’lum qildi, deb yozadi “Korrespondent.net”.
“MAGATE tomonidan taqdim etilgan muddat bir necha kun avval tugadi va boshqa uzaytirilmaydi. Biz endi agentlikka hech qanday yozuvlar va ma’lumotlarni taqdim etmaymiz”, — dedi Galibaf.
Avvalroq MAGATE Tehron Eron yadro obyektlaridagi monitoring haqidagi texnik kelishuvni uzaytirish masalasi bo‘yicha zudlik bilan javob berishi kerakligini aytgandi, uning muddati 24-iyun kuni yarim tunda tugagan. Agentlik bosh direktori Rafael Grossining so‘zlariga ko‘ra, Eronning yadro sohasidagi faoliyati haqida ma’lumotlar to‘plashni davom ettirish hayotiy muhim masala hisoblanadi.
May oxirida MAGATE va Eron 23-may kuni amal qilish muddati tugaydigan, mamlakat yadro obyektlaridagi monitoring to‘g‘risidagi vaqtinchalik texnik bitimni uzaytirish bo‘yicha kelishib olgan va u 24-iyungacha uzaytirilgan edi.
Eng dastlabki kelishuvga 23-fevral kuni, Eronning yangi qonuni kuchga kirganidan keyin erishilgan, u MAGATE bilan kafolatlar haqidagi bitimga qo‘shimcha protokolning amal qilishini to‘xtatib qo‘ygan edi. Natijada agentlik Eron yadro obyektlaridagi kuzatuv kameralaridan foydalanish huquqidan mahrum bo‘lgandi. Tehron esa agar AQSh Eronga nisbatan sanksiyalarni bekor qilmasa, kameralardan olingan ma’lumotlar o‘chirib tashlanishini ma’lum qildi.
Izoh (0)