Hindiston Milliy virusologiya instituti olimlari ko‘rshapalaklarda birinchi marta o‘limga olib keladigan darajada xavfli bo‘lgan Nipax virusiga nisbatan antitanalarni aniqladi, deb yozadi “RBK” tadqiqot natijalari bo‘yicha tayinlangan ilmiy maqolaga tayanib.
Ular Maxarashtra shtatidagi Maxabaleshvara shahri yaqinidagi g‘ordan ikki xil turga mansub ko‘rshapalaklarni tutib olgan. Oxir-oqibat bitta turdagi 56 ta ko‘rshapalakdan 33 tasida va ikkinchi turga mansub to‘rtta jonivorning bittasida antitanalar aniqlangan.
“Kasallanishning takroriy avj olishi, o‘lim darajasining yuqoriligi, odamdan odamga o‘tishi hamda samarali vaksinalar/virusga qarshi dorilarning yo‘qligi Hindistonda jiddiy xavotir uyg‘otadi, chunki odamlar ko‘p yashaydigan tumanlarda ko‘rshapalaklar juda keng tarqalgan”, — deya ma’lum qildi olimlar.
Shu bilan birga olimlarning qayd etishicha, virus mamlakatda qanchalik faol aylanayotganini tushunish uchun yanada tadqiqotlar o‘tkazish zarur.
Nipax virusi Jahon sog‘liqni saqlash tashkiloti (JSST) tomonidan eng xavfli viruslardan biri sifatida e’tirof etilgan. U odamlarga hayvonlardan o‘tadi, shuningdek, kasal odamdan boshqalarga ham yuqadi. Kasallik birinchi marta Malayziyada avj olgan, o‘shanda kasallanish manbasi cho‘chqalar bo‘lgan deb hisoblaniladi. Undan keyin Bangladesh va Hindistonda ham virus avj olgan, o‘shanda kasallangan hayvonlarning so‘laklari teggan mevalar ehtimoliy sabab bo‘lgan.
Nipax virusi keltirib chiqaradigan kasallikdan o‘lim darajasi 40-75 foiz oralig‘ida. Bu virusga qarshi dorilar ham, vaksinalar ham yo‘q.
Eslatib o‘tamiz, 2021-yil yanvarida Jahon sog‘liqni saqlash tashkiloti (JSST) 1999-yilda Malayziyada aniqlangan Nipax (NiV) virusi sababli yuzaga kelishi mumkin bo‘lgan pandemiya xavfi haqida ogohlantirgan edi.
Izoh (0)