Эрон Атом энергияси бўйича халқаро агентликка (МАГАТЭ) ўз ядро объектлари ҳақида ахборот беришни тўхтатади. Бу ҳақда Эрон парламенти спикери Муҳаммад Галибаф маълум қилди, деб ёзади «Korrespondent.net».
«МАГАТЭ томонидан тақдим этилган муддат бир неча кун аввал тугади ва бошқа узайтирилмайди. Биз энди агентликка ҳеч қандай ёзувлар ва маълумотларни тақдим этмаймиз», — деди Галибаф.
Аввалроқ МАГАТЭ Теҳрон Эрон ядро объектларидаги мониторинг ҳақидаги техник келишувни узайтириш масаласи бўйича зудлик билан жавоб бериши кераклигини айтганди, унинг муддати 24 июнь куни ярим тунда тугаган. Агентлик бош директори Рафаэл Гроссининг сўзларига кўра, Эроннинг ядро соҳасидаги фаолияти ҳақида маълумотлар тўплашни давом эттириш ҳаётий муҳим масала ҳисобланади.
Май охирида МАГАТЭ ва Эрон 23 май куни амал қилиш муддати тугайдиган, мамлакат ядро объектларидаги мониторинг тўғрисидаги вақтинчалик техник битимни узайтириш бўйича келишиб олган ва у 24 июнгача узайтирилган эди.
Энг дастлабки келишувга 23 февраль куни, Эроннинг янги қонуни кучга кирганидан кейин эришилган, у МАГАТЭ билан кафолатлар ҳақидаги битимга қўшимча протоколнинг амал қилишини тўхтатиб қўйган эди. Натижада агентлик Эрон ядро объектларидаги кузатув камераларидан фойдаланиш ҳуқуқидан маҳрум бўлганди. Теҳрон эса агар АҚШ Эронга нисбатан санкцияларни бекор қилмаса, камералардан олинган маълумотлар ўчириб ташланишини маълум қилди.
Изоҳ (0)