Eron yadro zavodida yuz bergan portlash terakt deb baholandi. Uni Isroil tashkillashtirgani xabar berilmoqda

Eronning Natanz shahridagi yadro zavodida elektr energiyasini taqsimlash tarmog‘ida avariya sodir bo‘ldi. Mazkur zavodda Eron yadro dasturining muhim qismi — uranni boyitish ishlari olib boriladi. Bu haqda Meduza xabar berdi.

Natanzdagi avariya Eron uranni boyitadigan yangi zamonaviy sentrifugalarni ishga tushirish to‘g‘risida e’lon qilganidan bir kun o‘tib sodir bo‘ldi. Eron hukumati avariya tafsilotlarini to‘liq oshkor qilmadi, ammo qurbonlar yo‘qligi va zararli moddalarning oqishi kuzatilmaganini ma’lum qildi.

Voqea sodir bo‘lgani haqidagi xabarlardan bir necha soat o‘tgach, Eron atom energiyasi tashkilotining (AEOI) rahbari Ali Akbar Solih uranni boyitish zavodidagi voqea “terroristik harakat” ekanini aytdi.

U Jahon hamjamiyatini va Xalqaro atom energiyasi agentligini (MAGATE) “yadroviy terrorizm”ga qarshi kurashishga chaqirdi, shuningdek, Eron bunday harakatlarga javoban tegishli choralarni ko‘rish huquqini o‘zida saqlab qolishini ta’kidladi.

Shuningdek, Natanz zavodidagi avariyadan so‘ng Ali Akbar Solih va AEOI rasmiy vakili Behruz Kamalvandi obyektni ko‘zdan kechirgani bordi. Atom inshootiga tashrifi chog‘ida Behruz Kamalvandi jarohat oldi. Xabarlarga ko‘ra, tashkilot vakili taxminan yetti metr balandlikdan yiqilib tushgan. U Kashan shahridagi kasalxonaga olib ketilgan. Shifokorlarning tashxisiga ko‘ra, Kamalvandining to‘piq suyagi sinib, boshidan ham jarohat olgan. Ma’lum qilinishcha, jabrlanuvchining ahvoli qoniqarli.

Natanzdagi avariyaga Isroil tomonidan uyushtirilgan portlash sabab bo‘lgan, deb yozmoqda The New York Times manbalariga asoslanib.

Gazetaning ta’kidlashicha, yadro inshootidagi elektr energiyasining uzilishi “puxta rejalashtirilgan portlatish” natijasida sodir bo‘lgan. AQSh va Isroil razvedkasi vakillari NYT’ga “avariyada Isroilning roli bor” deya ma’lum qilgan.

Razvedka manbalari gazetaga ushbu inshootda “katta portlash” sodir bo‘lganini, natijada uranni boyituvchi yerosti santrifugalarini quvvat bilan ta’minlaydigan “yaxshi himoyalangan ichki elektr tarmog‘i” yo‘q qilganini aytgan. Ularning fikriga ko‘ra, bu “Isroilning maxfiy operatsiyasi”.

Jerusalem Post gazetasining xabar berishicha, Eron yadro inshootidagi voqea kiberhujum natijasida sodir bo‘lgan va uning orqasida Mossad Isroil razvedka agentligi turgan bo‘lishi mumkin.

NYT ma’lum qilishicha, Natanzdagi zavodni qayta ishga tushirish uchun kamida to‘qqiz oy vaqt ketishi mumkin. Nashrning ta’kidlashicha, AQSh prezidenti Jo Bayden ma’muriyati Isroilning mazkur rejalaridan xabardor bo‘lgan-bo‘lmagani hozircha noma’lum bo‘lib qolmoqda.

Avvalroq Indoneziyaning neftni qayta ishlovchi Pertamina Balongan zavodida sodir bo‘lgan yong‘in oqibatida 5 kishi qattiq kuyish, 15 kishi yengil jarohat olgani haqida xabar berilgandi. Mumbaydagi Dreams Mall savdo markazida joylashgan koronavirus bemorlari davolanayotgan Sunrise Hospital shifoxonasida sodir bo‘lgan yong‘in oqibatida esa 10 kishi halok bo‘lgan.