Britaniya sog‘liqni saqlash vaziri ma’shuqasi bilan karantin qoidalarini buzgani uchun iste’foga chiqdi

Buyuk Britaniya sog‘liqni saqlash vaziri Mett Xenkok ma’shuqasi bilan surati OAV orqali e’lon qilingach, iste’fo uchun ariza berdi, deb yozadi “RBK”.

25-iyun kuni Britaniyaning Sun tabloidi e’lon qilgan suratda Xenkok Oksford universitetidagi o‘qishi chog‘ida tanishgan do‘sti Jina Koladanjelodan bo‘sa olayotgani aks etgan. Surat Sog‘liqni saqlash vazirligi binosida olingan.

Xenkokning ham, Koladanjeloning ham oilasi va bolalari bor. Ammo Britaniya jamoatchiligini nikohdan tashqari munosabatlar emas, vazirning koronavirusga qarshi cheklovlar kuchaygan bir paytda ijtimoiy masofaga rioya qilmagani holati norozi qildi. Shuningdek, Xenkok Koladanjeloni dastlab shaxsiy yordamchi, so‘ng vazirlik kengashiga a’zo qilib ishga olgani ham vaziyatni yanada mojaroli qildi.

Xenkokning o‘zi bosh vazir Boris Jonsonga yo‘naltirilgan iste’fo haqidagi arizasida uning shaxsiy hayoti mamlakatning asosiy vazifasi — pandemiya oqibatida yuzaga kelgan inqirozdan chiqishidan chalg‘itishini istamaganini bildirdi.

“Qoidalarni buzganim uchun kechirim so‘rayman, oilam va yaqinlarimdan ularni bu sinovga ro‘baro‘ qilganim uchun uzr so‘rayman. Bundan tashqari, bunday vaqtda men o‘z bolalarim bilan bo‘lishim kerak”, — deb yozdi sog‘liqni saqlash vaziri.

Keyinroq Britaniya bosh vazirining matbuot xizmati Xenkokning o‘rniga sobiq moliya hamda ichki ishlar vaziri Sajid Javid tayinlanishini ma’lum qildi.

Eslatib o‘tamiz, avvalroq Braziliya prezidenti Jair Bolsonaruga San-Paulu shtatida bo‘lib o‘tgan motopoygada niqob taqmagani uchun jarima solingan edi.