Qirg‘iziston sog‘liqni saqlash va ijtimoiy rivojlanish vaziri Alimqodir Beyshenaliyev COVID-19’ga chalindi. Ilgari u koronavirusga qarshi emlangandi, deb yozadi “RBK”.
Vazirning so‘zlariga ko‘ra, PZR-testi unda infeksiya mavjudligini ko‘rsatgan. “Kecha o‘zimni yomon his qilgandim, bugun esa suhbatlasha olaman. Hozir uydan ishlayapman”, — deya qo‘shimcha qildi u.
Bundan tashqari, Beyshenaliyev Issiqko‘l o‘simligi bo‘lgan zaharli ayiqtovon ildizi damlamasini ichishda davom etayotgani, avvalroq boshqalarga ham ushbu damlamadan foydalanishni tavsiya qilgani haqida aytib o‘tdi.
Qirg‘iziston sog‘liqni saqlash vaziri 29-mart kuni Xitoyning Sinopharm kompaniyasida ishlab chiqarilgan koronavirusga qarshi vaksina bilan emlangan edi.
Aprel oyi o‘rtalarida Beyshenaliyev Qirg‘iziston shifokorlari koronavirusga davo sifatida ayiqtovon damlamasidan foydalanayotganini aytdi. Uning qo‘shimcha qilishicha, bu tayyor yechim.
“Sog‘likka hech qanday zarari yo‘q. Damlamani issiq holda ichishingiz kerak, ikki-uch kun ichida PZR-testining ijobiy natijasi yo‘qoladi va odam darhol o‘zini yaxshi his qiladi”, — degandi u.
Shu bilan birga, JSST zaharli ildiz damlamasi bilan davolashni ma’qullamadi. Tashkilot qayd etishicha, klinik sinovlardan o‘tmagan dorini ro‘yxatdan o‘tkazish va aholiga keng qo‘llash uchun tavsiya etish mumkin emas.
Rossiyalik mutaxassislar ham ayiqtovoning koronavirusga qarshi samarali ekaniga shubha bildirdi. “Ayiqtovon zahari kuchli o‘simlik bo‘lib, tarkibida eng kuchli toksik alkaloidlar bor. Undan koronavirusni davolashda foydalanmaslik kerak”, — dedi professional o‘simlikshunos Dmitriy Yurovskiy. Tibbiyot fanlari doktori, fitoterapevt Sergey Turishchev esa bu zaharli o‘simlik ekanini va hayot uchun muhim organlarga toksik ta’sir ko‘rsatishi mumkinligini ta’kidladi.
Izoh (0)