Rossiya qurilish maydonlariga 2024-yilga qadar 5 millionga yaqin mehnat muhojirlari jalb qilinishi kerak. Bu haqda Rossiya bosh vazirining o‘rinbosari Marat Xusnullin ma’lum qildi.
“Ko‘ryapmizki, 2024-yilgacha kamida 5 million mehnat resursiga ehtiyoj sezamiz. Hozir bosh vazir buyrug‘i bilan yondashuvlarni ishlab chiqmoqdamiz, ular bilan qanday ishlash, ularning mamlakat taraqqiyotiga maksimal hissa qo‘shishi uchun nima qilishimiz haqida”, — dedi Xusnullin uy-joy qurilishi va hududlar infratuzilmasini rivojlantirish sohasidagi milliy maqsadlarga erishish masalalariga bag‘ishlangan yig‘ilishda.
Shuningdek, u gubernatorlarga Rossiya Federatsiyasi hududlaridagi qurilish maydonlariga mehnat resurslarini jalb etish masalasini hal qilish iltimosi bilan murojaat etdi. “Bu mashg‘ulot o‘tkazish, bu jalb qilish va hatto ishsiz nafaqaxo‘rlarni ham safarbar qilishdir”, — ta’kidladi bosh vazir o‘rinbosari.
Mart oyining boshida Rossiya Qurilish vazirligi mamlakat qurilish maydonlariga 1,2 millionga yaqin ishchi yetishmayotganini ma’lum qilgan. Ushbu muammoni hal qilish maqsadida Qurilish vazirligi bo‘sh o‘rinlarni to‘ldirish uchun muhojirlarni olib kirish mexanizmiga o‘zgartirish kiritmoqda.
Shuningdek, mahbuslarni qurilish maydonlariga jalb qilish imkoniyati ham ko‘rib chiqilmoqda. Xususan, Moskvada muhojirlar o‘rniga mahbuslarni qurilish ishlariga jalb qilish boshlab yuborilgan.
Avvalroq Rossiya Qurilish vazirligi va kommunal xizmatlar boshqarmasi migrantlarning qurilish ishlariga kelishlari uchun mamlakatga kirish shartlarini soddalashtirishni so‘ragan va bir qator takliflar bergan edi. Xusnullinning ma’lum qilishicha, mehnat muhojirlarining qurilishda ishlash uchun mamlakatga temiryo‘l orqali kelishiga ruxsat berilishi mumkin.
Izoh (0)