Ryanair samolyoti favqulodda qo‘nganidan keyin Belarusda hibsga olingan Nexta Telegram kanalining sobiq bosh muharriri Roman Protasevich va uning sevgilisi Sofya Sapega tergov izolyatoridan uy qamog‘iga o‘tkazildi. Bu haqda hibsga olinganlarning ota-onalari “Rossiya BBC xizmati”ga xabar berdi.
Ularning so‘zlariga ko‘ra, hozirda Protasevich va Sapega Minskda ijaraga olingan alohida-alohida kvartirada yashamoqda. Sapeganing advokatlari va Rossiya elchixonasi unga nisbatan ehtiyot choralari o‘zgartirilgani haqidagi ma’lumotni tasdiqladi. Hibsga olinganlarni uy qamog‘iga o‘tkazish ularning yaqinlari uchun kutilmagan yangilik bo‘ldi.
“Buni eshitib shokka tushdik”, — dedi Sofyaning o‘gay otasi Sergey Dudich.
“Rasmiylarning xatti-harakatlari, ularning maqsadlari haqida bir nima deyishim qiyin”, — dedi Romanning otasi Dmitriy Protasevich agentlikka. “Balki u qandaydir siyosiy o‘yinga aralashib qolgan bo‘lishi mumkin”.
Uning ta’kidlashicha, Belarus rasmiylari hibsga olinganlarga qarshi ayblovlarni bekor qilmagan. “Ehtiyot chorasi o‘zgartirilishi bilan ularning yashash sharoitlari yaxshilangan, xolos. Qolganlariga kelsak, bundan keyin nima bo‘lishi noma’lum”, — deya qo‘shimcha qildi Dmitriy Protasevich.
23-iyun kuni Belarusning muxolifatchi blogeri Anton Motolko o‘zining telegram kanalida fotosuratlar chop qilgan. Suratlarda Protasevich va Sapega go‘yoki Minskdagi parkda erkin aylanib yurib, ba’zi jurnalistlarga kamera qarshisida intervyu bergani aks etgan.
Sofya Sapeganing advokati Anton Gashinskiy mijozining tergov izolyatoridan uy qamog‘iga o‘tkazilishini Rossiya va Belarus prezidentlarining uchrashuvi bilan bog‘ladi. “Shu tufayli Sofyaning kelajakdagi taqdiri aniq va ijobiy bo‘ladi. O‘ylaymanki, u uyiga qaytadi”, — dedi advokat.
Belarus hukumati Roman Protasevichga mamlakat Jinoyat kodeksining uchta moddasi bo‘yicha: 130 (ijtimoiy adovat va kelishmovchilikni qo‘zg‘atish), 293 (ommaviy tartibsizliklarni uyushtirish) va 342 (jamoat tartibini qo‘pol ravishda buzadigan harakatlarni uyushtirish) bilan ayblamoqda.
Rossiyalik Sofya Sapega esa Belarus Jinoyat kodeksining ikki moddasi bo‘yicha gumon qilinmoqda: 130 (ijtimoiy nafrat va nifoqni qo‘zg‘ash) va 342 (ommaviy tartibsizliklarda qatnashish).
3-iyun kuni Belarusning “ONT” davlat telekanali Roman Protasevich bilan o‘tkazilgan uzoq intervyuni namoyish qildi, unda Protasevich Belarus muxolifatini tanqid qildi va Aleksandr Lukashenkoni hurmat qilishini bildirdi. 14-iyun kuni Belarus Tashqi ishlar vazirligida Protasevich ishtirokida brifing bo‘lib o‘tdi, birfingda u tergov organlari bilan ixtiyoriy ravishda hamkorlik qilganini aytdi.
Protasevichning onasi o‘g‘lining brifingdagi ishtirokini unga tahdid qilinayotgani bilan izohladi. Jurnalistning ota-onasi ta’kidlashicha, o‘g‘li qiynoqqa solingan.
Eslatib o‘tamiz, 23-may kuni Belarus hukumati Ryanair aviakompaniyasining Afinadan Vilnyusga uchayotgan samolyotini shoshilinch ravishda Minskka qo‘nishga majbur qilgandi. Samolyot yo‘lovchilari orasida Roman Protasevich ham bor edi. Protasevich va uning sevgilisi — Rossiya fuqarosi Sofya Sapega aeroportda qo‘lga olingan.
Izoh (0)