Қирғизистон соғлиқни сақлаш ва ижтимоий ривожланиш вазири Алимқодир Бейшеналиев COVID-19’га чалинди. Илгари у коронавирусга қарши эмланганди, деб ёзади «РБК».
Вазирнинг сўзларига кўра, ПЗР-тести унда инфекция мавжудлигини кўрсатган. «Кеча ўзимни ёмон ҳис қилгандим, бугун эса суҳбатлаша оламан. Ҳозир уйдан ишлаяпман», — дея қўшимча қилди у.
Бундан ташқари, Бейшеналиев Иссиқкўл ўсимлиги бўлган заҳарли айиқтовон илдизи дамламасини ичишда давом этаётгани, аввалроқ бошқаларга ҳам ушбу дамламадан фойдаланишни тавсия қилгани ҳақида айтиб ўтди.
Қирғизистон соғлиқни сақлаш вазири 29 март куни Хитойнинг Sinopharm компаниясида ишлаб чиқарилган коронавирусга қарши вакцина билан эмланган эди.
Апрель ойи ўрталарида Бейшеналиев Қирғизистон шифокорлари коронавирусга даво сифатида айиқтовон дамламасидан фойдаланаётганини айтди. Унинг қўшимча қилишича, бу тайёр ечим.
«Соғликка ҳеч қандай зарари йўқ. Дамламани иссиқ ҳолда ичишингиз керак, икки-уч кун ичида ПЗР-тестининг ижобий натижаси йўқолади ва одам дарҳол ўзини яхши ҳис қилади», — деганди у.
Шу билан бирга, ЖССТ заҳарли илдиз дамламаси билан даволашни маъқулламади. Ташкилот қайд этишича, клиник синовлардан ўтмаган дорини рўйхатдан ўтказиш ва аҳолига кенг қўллаш учун тавсия этиш мумкин эмас.
Россиялик мутахассислар ҳам айиқтовонинг коронавирусга қарши самарали эканига шубҳа билдирди. «Айиқтовон заҳари кучли ўсимлик бўлиб, таркибида энг кучли токсик алкалоидлар бор. Ундан коронавирусни даволашда фойдаланмаслик керак», — деди профессионал ўсимликшунос Дмитрий Юровский. Тиббиёт фанлари доктори, фитотерапевт Сергей Туришчев эса бу заҳарли ўсимлик эканини ва ҳаёт учун муҳим органларга токсик таъсир кўрсатиши мумкинлигини таъкидлади.
Изоҳ (0)