Qozog‘iston poytaxti Nur-Sultonda karantin choralari kuchaytirildi. Bu haqda poytaxt bosh sanitariya shifokorining yangi qaroriga asoslanib, Tengrinews xabar berdi.
Xabarga ko‘ra, koronavirusning paydo bo‘lishi va tarqalishining oldini olish bo‘yicha idoralararo komissiya yig‘ilishining 22-iyundagi bayonnomasi asosida poytaxtning bosh davlat sanitariya shifokori Sarhat Beysenova Nur-Sultonda cheklov va karantin choralarini kuchaytirish to‘g‘risida farmon imzoladi.
Bosh sanitariya shifokori Nur-Sulton aholisi va mehmonlariga quyidagi talablarga rioya qilishni belgilab berdi:
- Ommaviy tadbirlarni, shu jumladan, uyda tashkil qilinadigan oilaviy ziyofatlar, to‘ylar, yubileylar va boshqalarni o‘tkazish va ularda qatnashish taqiqlandi. Ushbu tadbirlarni Ashyq loyihasiga kiritilgan binolarda o‘tkazish bundan mustasno.
- Faoliyati tiklanmagan obyektlarga: bouling markazlari, kompyuter klublari, PlayStation klublari, kinoteatrlar, bilyard xonalari, karaoke, kinoteatrlar, batutlar, tungi klublar, bukmekerlar, o‘yin klublari va boshqalarga tashrif buyurmaslik so‘raladi (Ashyq loyihasida ishtirok etadigan obyektlar bundan mustasno).
- Jamoat joylariga, jumladan, shahar jamoat transportiga va faoliyatiga ruxsat berilgan obyektlarga borishda, shuningdek, jamoat joylarida ochiq havoda bo‘lganida niqob taqish, masofani saqlash va antiseptiklardan foydalanish talablariga qat’iy rioya qilish so‘raladi.
- Yakka tartibda va kamida 5 metrlik ijtimoiy masofani saqlash sharti bilan 5 kishidan ko‘p bo‘lmagan shaxslar guruhida ochiq havoda sport mashg‘ulotlarini o‘tkazishga ruxsat beriladi.
Sanitariya shifokori Ashyq loyihasini quyidagi biznes obyektlarida davom ettirishga qaror qildi: fitnes-klublari, shu jumladan, yoga markazlari, kurort markazlari, saunalar, suzish havzalari, kompyuter klublari, PlayStation klublari (16 yoshgacha bo‘lganlar bundan mustasno), umumiy ovqatlanish shoxobchalari, viloyatlararo va shahar turistik transport, billiard klublari, konsert zallari va boshqalar.
Bundan tashqari, ishlab chiqarish ehtiyojiga qarab mulkchilik shaklidan qat’i nazar, davlat organlari, milliy kompaniyalar, korxonalar ma’muriy xodimlarining kamida 80 foizini masofaviy ishlash shakliga o‘tkazish nazarda tutilgan. Shu bilan birga, COVID-19’ga qarshi emlashning to‘liq kursini olgan va so‘nggi 3-6 oy ichida COVID-19’dan davolangan barcha xodimlar uchun oflayn rejimda ishlashga ruxsat beriladi.
Universitet va kollej talabalari uchun yakuniy imtihonlar masofadan turib o‘tkaziladi. Bitiruv kechalarini tashkil etish va o‘tkazish hamda universitet va kollejlarda diplomlarni oflayn rejimda topshirish taqiqlandi.
Savdo-ko‘ngilochar markazlar, savdo uylari faoliyatiga ish kunlari soat 10.00 dan 17:00 gacha ruxsat beriladi, shanba va yakshanba kunlari ishlash taqiqlandi. Ushbu markazlarda joylashgan oziq-ovqat va dorixonalar, COVID-19’ga qarshi ommaviy emlash punktlari bundan mustasno.
Umumiy ovqatlanish korxonalari (restoranlar, kafelar, barlar, oshxonalar), joylashish joyidan qat’i nazar, kuchaytirilgan chora-tadbirlarga rioya qilgan holda va qo‘shni stollar orasida kamida ikki metr ijtimoiy masofani saqlagan holda soat 07.00 dan 20.00 gacha faqat ish kunlari tashrif buyuruvchilarga xizmat qiladi. Shuningdek, ish va dam olish kunlari soat 07.00 dan 22.00 gacha yetkazib berish va olib ketish rejimida ishlaydi.
Yopiq oziq-ovqat va nooziq-ovqat bozorlari soat 10.00 dan 20.00 gacha faqat ish kunlari ochiq bo‘ladi.
Avvalroq Qozog‘istonda koronavirusning “hindcha” shtammi tufayli karantin choralari kuchaytirilishi mumkinligi xabar qilingandi. Qozog‘istonda sanitariya-epidemiologik vaziyat barqaror, ammo poytaxt Nur-Sultonda “hindcha” shtamm tarqalish ehtimoli mavjud.
Nur-Sulton hokimligi aniqlik kiritishicha, “hindcha” shtamm paydo bo‘lish ehtimolini hisobga olgan holda, poytaxtda 54 nafar bemor qo‘shimcha tekshiruvdan o‘tkazilgan. Bemorlarning 56 foizida delta shtammi borligi aniqlangan. Shu sababli Nur-Sulton shahri va boshqa viloyatlarda sanitariya-epidemiologik talablarni kuchaytirish bo‘yicha choralar ko‘rib chiqila boshlangan.
Izoh (0)