Buyuk Britaniyada ingliz matematigi va kriptografi Alan Tyuring tasvirlangan 50 funt sterlinglik polimer banknota muomalaga kiritildi, deb yozadi “Korrespondent.net”.
Qayd etilishicha, yangi kupyurani yaqin kunlar va haftalarda bank filiallari va bankomatlaridan olish mumkin, shundan so‘ng eski qog‘oz kupyuralar muomaladan olinadi.
20 va 50 funt qiymatdagi eski qog‘oz pullarning muomalasi 2022-yil 30-sentabrgacha amal qiladi. Shundan so‘ng ular qonuniy to‘lov vositasi xususiyatini yo‘qotadi.
Avvalroq Angliya banki Alan Tyuring tasviri tushirilgan banknotani taqdim etgan hamda kupyura olimning tug‘ilgan kuni — 23-iyundan muomalaga kiritilishini xabar qilgan. Tyuring Ikkinchi jahon urushida Buyuk Britaniyaning g‘alabasiga katta hissa qo‘shgan.
Matematikning portretidan tashqari banknotada uning 1936-yilda ishlab chiqilgan matematik formulalari tasvirlangan. Ular zamonaviy kompyuter fanining asosiga aylangan. Ushbu formulalar Enigma nemis shifrlash mashinasining kodini buzishga yordam bergan.
Buyuk Britaniyada bunga qadar ham 5, 10 va 20 funt sterlinglik qog‘oz pullar yangi kupyuralarga almashtirilgan.
Izoh (0)