Буюк Британияда инглиз математиги ва криптографи Алан Тьюринг тасвирланган 50 фунт стерлинглик полимер банкнота муомалага киритилди, деб ёзади «Korrespondent.net».
Қайд этилишича, янги купюрани яқин кунлар ва ҳафталарда банк филиаллари ва банкоматларидан олиш мумкин, шундан сўнг эски қоғоз купюралар муомаладан олинади.
20 ва 50 фунт қийматдаги эски қоғоз пулларнинг муомаласи 2022 йил 30 сентябргача амал қилади. Шундан сўнг улар қонуний тўлов воситаси хусусиятини йўқотади.
Аввалроқ Англия банки Алан Тьюринг тасвири туширилган банкнотани тақдим этган ҳамда купюра олимнинг туғилган куни — 23 июндан муомалага киритилишини хабар қилган. Тьюринг Иккинчи жаҳон урушида Буюк Британиянинг ғалабасига катта ҳисса қўшган.
Математикнинг портретидан ташқари банкнотада унинг 1936 йилда ишлаб чиқилган математик формулалари тасвирланган. Улар замонавий компьютер фанининг асосига айланган. Ушбу формулалар Enigmа немис шифрлаш машинасининг кодини бузишга ёрдам берган.
Буюк Британияда бунга қадар ҳам 5, 10 ва 20 фунт стерлинглик қоғоз пуллар янги купюраларга алмаштирилган.
Изоҳ (0)