Qozog‘iston shimolida yana parranda grippi qayd etildi. Shimoliy Qozog‘iston viloyatining Ayirtav tumani Savmalko‘l qishlog‘ida yovvoyi parrandalar nobud bo‘ldi. Qishloq aholisi 100 dan ortiq o‘rdak va ikki chag‘alakning jasadlarini topdi, deb yozadi Tengrinews.
Xabarga ko‘ra, laboratoriya tekshiruvlari natijalari o‘lim holatlariga virus sabab bo‘lganini tasdiqlagan. Ayni paytda mutaxassislar kasallik tarqalishining oldini olish uchun parrandalarni emlamoqda.
“Savmalko‘l ko‘li yaqinida joylashgan aholi punktlarida uy parrandalarini emlash ishlari olib borilib, 7 600 bosh parranda emlandi. Umumiy hisobda viloyat bo‘ylab 485 ming parranda emlandi. Gripp va boshqa kasalliklar bo‘yicha epidemik vaziyat barqaror, yovvoyi va uy parrandalari o‘limi bo‘yicha yangi holatlar qayd etilmagan”, — dedi Shimoliy Qozog‘iston viloyati veterinariya boshqarmasi boshlig‘i Qayirli Kazanov.
Ta’kidlanishicha, virus tufayli 2020-yilning kuzida mintaqadagi yarim milliondan ortiq tovuq va g‘ozlar qirilib ketgan. Ayniqsa, mahalliy parrandachilik fermalari zarar ko‘rgan. Ularning egalari hali ham favqulodda vaziyatdan xalos bo‘lmagan va parrandalar o‘rnini tiklay olmagan.
Eslatib o‘tamiz, 2020-yil Olmaota viloyatidagi eng yirik parrandachilik fermer xo‘jaliklaridan birida parranda grippi sababli 22 mingdan ortiq parranda nobud bo‘lgan.
Izoh (0)