AQSh Eronning kemasozlik va neft-gaz sohasi hamda mamlakatning yuqori rahbariyatiga nisbatan kiritilgan sanksiyalarni bekor qilishga qaror qildi. Hammasi bo‘lib mingdan ortiq cheklovlarni bekor qilish rejalashtirilgan, deb yozadi Reuters Eron vakiliga asoslanib.
“AQSh sobiq prezidenti Donald Tramp tomonidan kiritilgan barcha sug‘urta, neft va kemasozlik sohasidagi sanksiyalarini bekor qilish to‘g‘risida kelishuvga erishildi”, — dedi Eronning amaldagi prezidenti Hasan Ruhoniy ma’muriyatining rahbari Mahmud Voiziy.
Voiziyning ma’lum qilishicha, erishilgan kelishuvga muvofiq, AQSh 1040 ga yaqin cheklovlarni bekor qiladi. “Shuningdek, alohida shaxslarga va oliy rahnamoga yaqin doiradagi kishilarga nisbatan ba’zi sanksiyalarni bekor qilishga kelishib olindi”, — deya qo‘shimcha qildi u.
AQSh, Eron va yadroviy bitimni imzolagan boshqa davlatlar anchadan buyon Venada Islom davlatining o‘z majburiyatlarini bajarishiga qaytishi to‘g‘risida muzokaralar olib bormoqda.
2015-yilda AQSh, Buyuk Britaniya, Rossiya, Fransiya, Xitoy, Germaniya va Yevropa Ittifoqi Eron bilan “2015-yilgi yadroviy harakatlar rejasini” imzolagan edi. Ular iqtisodiy sanksiyalarni bekor qilish evaziga Eron hukumatining o‘z yadro dasturidan voz kechishiga kelishib olgandi.
Keyinchalik AQSh sobiq prezidenti Donald Tramp mamlakatni Eron yadro dasturi to‘g‘risidagi kelishuvdan chiqardi va Eron rejimiga qarshi yangi sanksiyalar kiritdi. Tehron “Amerika urush boshladi” deya o‘zining ham yadroviy kelishuvdan to‘liq chiqib ketganini e’lon qildi.
Avvalroq Eronning yangi prezidenti Ibrohim Raisiy agar bitimning qolgan qatnashchilari o‘z majburiyatlarini to‘liq bajarsa, Eronning yangi hukumati ham yadroviy bitimni qo‘llab-quvvatlashini aytgandi.
Izoh (0)