Moskva viloyatida dronlar niqob rejimini nazorat qiladi, Braziliyada kasallanganlar soni bo‘yicha rekord o‘rnatildi, Buryatiyada lokdaun e’lon qilindi. Koronaxabarlar

Jons Hopkins universiteti ma’lumotlariga ko‘ra, dunyoda koronavirusni yuqtirib olganlar soni 179 599 617 kishiga yetgan, shularning 3 891 945 nafari vafot etgan. Kasallanish holatlarining ko‘pligi bo‘yicha AQSh (33,5 million), Hindiston (30 million), Braziliya (18,1 million), Fransiya (5,8 million) va Turkiya (5,3 million) yetakchilik qilmoqda.

Braziliyada koronavirusga chalinganlar soni bo‘yicha rekord qayd etildi

Braziliyada pandemiya boshidan buyon bir kecha-kunduzda koronavirus bilan kasallanganlar soni bo‘yicha yangi rekord o‘rnatildi — bir kunda 115 228 kishida virus aniqlandi. So‘nggi bir sutkada mamlakatda 2392 kishi COVID-19 oqibatida vafot etdi. Shu tariqa butun pandemiya davrida kasallanganlar soni 18,16 million, vafot etganlar esa 507,1 ming kishiga yetdi.

Bundan avvalgi rekord mamlakatda 25-mart kuni qayd etilgan edi. O‘shanda bir kecha-kunduzda 100 158 kishida virus aniqlangan edi. Kasallanish holatlarining keskin o‘sishi 22-iyundan boshlab kuzatilmoqda.

Buryatiyada koronavirus tufayli lokdaun e’lon qilindi

Rossiya tarkibiga kiruvchi Buryatiya Respublikasi hukumati koronavirus infeksiyasi tarqalishi munosabati bilan Respublika hududida lokdaun kiritilishini e’lon qildi.

27-iyundan 11-iyulgacha hududda ishlanmaydigan kunlar rejimi e’lon qilindi. Bu vaqt oralig‘ida barcha korxonalar o‘z faoliyatini to‘xtatadi, eng zarur mahsulotlar bilan savdo qiluvchi do‘konlar, dorixonalar, jamoat transporti, OAVlar va uy-joy va kommunal xizmatlari bundan mustasno.

Ommaviy dam olish joylariga, xususan, Baykal ko‘li atrofiga kirish cheklanadi. Bundan tashqari, 14 yoshgacha bo‘lgan bolalar faqat kattalar hamrohligida ko‘chaga chiqishi mumkin.

Podmoskovyeda dronlar qurilish maydonlaridagi ishchilarga niqob taqishni eslatib turadi

Podmoskovye (Moskva viloyati)da kopterlar qurilish maydonlari ustida uchib, niqob rejimi va ijtimoiy masofaga rioya qilish zarurati haqida ogohlantiradi, bu haqda Moskva viloyati qurilish idorasi vakili ma’lum qildi. “Kopterlarning parvoz hududi — butun Moskva viloyati. Parvozlar har kuni amalga oshiriladi”, — dedi u.

Ayni paytgacha dronlar Podmoskovyedagi qurilish maydonlarining taxminan 70 foizini aylanib uchib chiqqan.

Birinchi navbatda parvozlar COVID-xavfsizlik ko‘rsatkichi past bo‘lgan qurilish maydonlarida amalga oshirilgan. Dronlar parvozi epidemiologik vaziyat barqarorlashmagunicha davom etadi.

Shuningdek:

• Kiprdagi Nikosiya universiteti tadqiqotchilari koronavirus havoda daraxt gulchanglari orqali tarqalishi mumkinligini aniqladi. Ma’lum bo‘lishicha, COVID-19’ning avj nuqtalari va havodagi gulchanglari konsentratsiyasi o‘rtasida bog‘liqlik bor.
• Jahon sog‘liqni saqlash tashkiloti (JSST) bolalar va o‘smirlarni koronavirusga qarshi emlashga chaqirdi. Tashkilot birinchi marta bolalarni COVID-19’ga qarshi emlash mumkinligini ma’lum qildi. Bungacha JSST COVID-vaksinalarning bolalarga qanday ta’sir qilishi haqidagi ma’lumotlar yetarli emasligini aytib, ularni emlashni maslahat bermagan edi.
• Gretsiyada 24-iyundan ko‘chada niqob taqish majburiyati, 28-iyundan esa komendantlik soati bekor qilinmoqda. Mamlakatda koronavirusga chalinish bo‘yicha yangi holatlar kamaygani sababli shunday qaror qabul qilindi.
• Isroilda esa, aksincha, COVID-19 qaytadan avj olishi tufayli cheklovlar yana kuchaytirilmoqda. Xalqaro aeroportda, chegaradan o‘tish joylarida va tibbiy yordam ko‘rsatiladigan joylarda niqob taqish majburiy bo‘ldi. Vaksinatsiya haqidagi sertifikati bo‘lgan odamlar “delta” shtammiga chalingan odam bilan muloqot qilgan bo‘lsa, karantinga yuborilishi mumkin.