Janubiy Afrika Respublikasi (JAR)da biryo‘la 10 bola tug‘ilgani haqidagi xabar muallifi Pit Rampedi tasdiqlanmagan hikoyani nashr etgani uchun o‘z tahririyatidan uzr so‘radi, deb yozadi “RIA Novosti”.
8-iyun kuni JARning Gauteng provinsiyasida 37 yoshli Goziam Sitxol biryo‘la o‘n chaqaloqni dunyoga keltirib, dunyo rekordini yangilagani haqida xabar berilgandi.
Biroq Janubiy Afrika Sog‘liqni saqlash vazirligi ushbu ma’lumotni tasdiqlamadi. Goziam Sitxolning turmush o‘rtog‘i ham bolalarni ko‘rmaganini aytdi.
Maqola muallifi manbalarga ishonib, ushbu bolalar tug‘ilishi masalasini chuqur o‘rganmaganini va surishtiruv o‘tkazmaganini tan oldi, ammo u ayolning homilador bo‘lgani va farzand ko‘rganiga ishonchi komilligini aytdi.
“Sizga 2021-yil 8-iyunda chop etilgan 10 chaqaloq hikoyasi qanday qabul qilingani va uning kompaniya obro‘siga muqarrar ta’siri haqida afsus va pushaymonlik bilan yozmoqdaman. Shuni aytishim kerakki, men boshidanoq Goziam Sitxolning homiladorligi va haqiqatan shuncha farzand dunyoga keltirgani haqidagi faktni qattiq turib ma’qullab kelmoqdaman. Bu maqola bilan jamoa, kompaniya va hamkasblarimning obro‘siga putur yetkazganimdan afsusdaman. Buning uchun sizdan va hamkasblarimdan uzr so‘rayman”, — deb yozgan Rampedi tahririyat bosh muharririga.
Avvalroq Goziam Sitxolning eri politsiyaga murojaat qilib, Sitxol g‘oyib bo‘lganini va 8-iyun kuni — u o‘nta bola dunyoga keltirganini e’lon qilganidan keyin darhol aloqalarni uzganini aytgan. Politsiya ayolni topib, vakolatli xizmatlarga topshirgan. Ayni paytda ayol ruhiy kasalliklar shifoxonasiga yotqizilgan.
Izoh (0)