Eron xalqi o‘zgarishlarni, korrupsiyaga qarshi kurashishni va farovonlik darajasini oshirishni talab qilmoqda, ushbu talablar yangi hukumat tomonidan amalga oshiriladi. Bu haqda 21-iyun kuni Eronning yangi prezidenti Ibrohim Raisiy lavozimiga kirishganidan keyingi birinchi matbuot anjumanida aytib o‘tdi, deb yozadi “TASS”.
“Eron xalqining murojaati — o‘zgarishlar haqida. Eron xalqining murojaati — bu korrupsiya, qashshoqlik va kamsitishlarga qarshi kurash, shuningdek adolatni ta’minlash haqida” — dedi u.
Raisiyning qo‘shimcha qilishicha, “bu yangi hukumat quloq solishi lozim bo‘lgan murojaatdir”.
Uning so‘zlariga ko‘ra, “hukumatning ustuvor yo‘nalishlari ishbilarmonlik muhitini, odamlar hayotini va hukumatdagi vaziyatni yaxshilash, shuningdek ma’muriy tizimni isloh qilish va o‘zgarishlarga to‘sqinlik qiladigan odatiy byurokratiyani yo‘q qilishdan iborat bo‘ladi”.
“Eronning yadroviy bitimi” haqida so‘z ketar ekan Raisiyning ta’kidlashicha, agar bitimning qolgan qatnashchilari o‘z majburiyatlarini to‘liq bajarsa, Eronning yangi hukumati ham uni qo‘llab-quvvatlaydi.
Shuningdek, Raisiy Eronning raketa dasturi xalqaro muzokaralarda muhokama qilinmasligini aytdi. “Bizning raketa dasturimiz va hududiy masalalar muhokama qilinmaydi, kelishilgan, ammo amalga oshirilmagan (yadroviy bitim qoidalari nazarda tutilyapti) masalalar hal qilinishi lozim”, — dedi u
AQSh bilan munosabatlar borasida Raisiy AQSh prezidenti Jo Bayden bilan uchrashish niyati yo‘qligini aytib o‘tdi.
Zamonaviy Eron tarixidagi o‘n uchinchi prezidentlik saylovlari 18-iyul kuni bo‘lib o‘tdi. Unda Ibrohim Raisiy 62 foizga yaqin ovozni qo‘lga kiritib, davlat rahbari bo‘ldi.
Ovoz berishda jami saylovchilarning 48,8 foizi — 28,9 milliondan ortiq odam qatnashgan.
Izoh (0)