Armanistondagi parlament saylovlarida Nikol Pashinyanning partiyasi g‘alaba qilib, mustaqil ravishda hukumat tuzish imkoniga ega bo‘ldi

Armaniston bosh vaziri vazifasini bajaruvchi Nikol Pashinyanning “Fuqarolik shartnomasi” partiyasi Armaniston Milliy majlisi (parlamenti) uchun navbatdan tashqari o‘tkazilgan saylovlarda g‘olib bo‘ldi. Bu haqda Meduza xabar berdi.

Mamlakat Markaziy saylov komissiyasining ma’lumotlariga ko‘ra, ovozlar 100 foiz hisoblab chiqilganidan so‘ng, saylovchilarning 53, 92 foizi Pashinyanning partiyasini qo‘llab-quvvatlagani ma’lum bo‘ldi.

“Saylovlardan so‘ng Pashinyan partiyasi mustaqil ravishda hukumat tuzish huquqiga ega bo‘ldi”, — dedi saylov komissiyasi rahbari Tigran Mukuchyan.

Mukuchyanning bayonotidan avval OAVda Pashinyanning partiyasiga yolg‘iz  hukumat tuzish uchun 0,08 foiz ovoz yetishmayotgani haqidagi xabarlar tarqalgan.

Komissiya rahbarining izoh berishicha, hukumatni “mandatlar umumiy sonining 54 foizini” olgan siyosiy kuch tashkil qilishi mumkin, Pashinyanning partiyasi qo‘lga kiritgan 53,92 foiz esa saylovdagi ovozlar soni. Buyog‘iga “Fuqarolik shartnomasi” saylov marrasidan o‘tmagan partiyalarning ovozini oladi.

Saylovlarda ikkinchi o‘rinni mamlakatning sobiq prezidenti Robert Kocharyanning “Armaniston” bloki qo‘lga kiritdi, unga saylovchilarning 21.04 foizi ovoz berdi. Uchinchi o‘rinni 5, 23 foiz ovoz bilan mamlakatning yana bir sobiq prezidenti Serj Sarkisyanning “Shon-sharaf” bloki egalladi.

Partiyalarning parlamentga o‘tish marrasi 5 foiz ovozni, bloklar uchun esa 7 foizni tashkil qiladi. Saylov kodeksiga ko‘ra, agar ikkita siyosiy kuch marradan o‘tsa, u holda marradan o‘tmagan, ammo qolganlarga qaraganda ko‘proq ovoz to‘plagan partiya yoki blok uchinchi bo‘lib parlamentga kiradi.

“Armaniston” blokining da’vo qilishicha, parlament saylovlari natijalari “bir-biriga zid va ishonchni oqlamaydi”, chunki ular soxtalashtirilgan bo‘lishi mumkin. Blok barcha qonunbuzarliklarni tekshirishni talab qildi.

Armanistonning yirik ishbilarmonlaridan biri Gagik Sarukyan boshchiligidagi “Obod Armaniston” partiyasi (3,96 foiz ovoz) parlamentga kira olmadi. Shuningdek, Edmond Marukyan boshchiligidagi “Yorqin Armaniston” partiyasi (1,22 foiz ovoz) ham marradan o‘tolmadi.

Armanistonda muddatidan avvalgi parlament saylovlari 20-iyun kuni bo‘lib o‘tdi, unda saylovchilarning 49,4 foizi ishtirok etdi.