Yevropa Ittifoqi Qrim va Sevastopolga qarshi kiritgan sanksiyalari muddatini bir yilga — 2022-yil 23-iyungacha uzaytirdi. Bu haqda Yevropa Kengashi veb-saytiga tayanib, “RBK” xabar berdi.
“Amaldagi cheklov choralari Yevropa Ittifoqiga Qrim yoki Sevastopolda ishlab chiqiladigan tovarlarning maqsadli importini, shuningdek, Qrim yoki Sevastopoldagi infratuzilma yoki moliyaviy investitsiyalar va turizm xizmatlaridan foydalanishni taqiqlaydi”, — deyiladi xabarda.
Cheklovlar, shuningdek, Qrim kompaniyalariga transport yoki telekommunikatsiya va energetika sohalarida yoki neft, gaz va mineral resurslarni qidirish va ishlab chiqarishda foydalanish uchun ma’lum tovar va texnologiyalarni eksport qilishni o‘z ichiga oladi.
Qrimga qarshi birinchi iqtisodiy sanksiyalar 2014-yil iyun oyida joriy qilingan edi. O‘shanda Yevropa Ittifoqiga 250 dan ortiq turdagi Qrim tovarlari, shu jumladan, minerallar, uglevodorodlar, dengiz suvi va tuz eritmalari importi taqiqlandi. Keyinchalik ro‘yxat bir necha bor kengaytirildi. 2020-yil kuzida Yevropa Ittifoqi sanksiyalar ro‘yxatiga Qrim ko‘prigi qurilishida ishtirok etgan ikki jismoniy va to‘rtta yuridik shaxsni qo‘shdi.
2014-yil mart oyida Qrimda referendum bo‘lib o‘tgan, unda yarimorol aholisining aksariyati Rossiyaga qo‘shilishni qo‘llab-quvvatlagan. Ukraina va bir qator G‘arb davlatlari ovoz berish natijalarini tan olmaydi va sodir bo‘lgan voqealarni “anneksiya” (bosib olish) deb hisoblaydi. AQSh Qrimning Rossiyaga qo‘shilishini hech qachon tan olmaslikka so‘z bergan. Rossiya hukumati bir necha bor Qrim masalasi tarixan yopiq ekanini ta’kidlagan.
Mavzuga doir:
Izoh (0)