Rossiyada COVID-19’ga qarshi emlanmagan fuqarolarga cheklovlar qo‘yish boshlandi, deb yozadi “RBK”.
Emlanganlik to‘g‘risidagi guvohnomasiz, xususan, Moskvada kasalxonada muolaja olishga ruxsat berilmaydi, Nijegorod viloyatida kinoteatrlarga, Buryatiyada esa hammom yoki go‘zallik salonlariga borish taqiqlanadi.
Bundan tashqari, poytaxtdagi kasalxonalarda muntazam tibbiy yordamni faqat emlangandan so‘ng olish mumkin bo‘ladi. Ushbu talab bir qator kasalliklarga chalinganlarga (onkologiya, gematologiya), shuningdek, emlanish tavsiya etilmagan kishilarga nisbatan qo‘llanilmaydi.
Universitet va kollejlarga masofadan turib emas, balki shaxsan hujjat topshiruvchilar vaksinatsiya sertifikatiga ega bo‘lishi lozim.
Ayni paytda majburiy vaksinatsiya faqat kattalar uchun joriy qilingan bo‘lib, 18 yoshga to‘lmaganlarga yuqoridagi cheklovlar taalluqli emas.
Rossiyada o‘tgan kun davomida 17 262 kishida koronavirus aniqlandi. Mamlakatda pandemiya boshidan beri jami 5,28 milliondan ortiq odam virus yuqtirgan. Shularning 4,85 million nafari tuzaldi, 128,4 mingdan ortig‘i vafot etdi.
Rossiya hududlarida COVID-19 bilan kasallanishning ortishi fonida u yoki bu shaklda majburiy vaksinatsiya boshlandi, asosan, xizmat ko‘rsatish, savdo, sog‘liqni saqlash, transport va madaniyat sohalari xodimlari, shuningdek, mansabdor shaxslar majburiy emlanmoqda. Aksariyat hududlarda xodimlarning kamida 60 foizi qisqa muddat ichida emlanishi lozim. 16-iyun kuni Rossiya Federatsiyasi prezidenti matbuot kotibi Dmitriy Peskov butun Rossiya bo‘ylab hali majburiy vaksinatsiya joriy qilinmaganini aytdi.
Ayni paytda Federatsiya tarkibiga kiruvchi 85 hududning 11 tasida yuqoridagi soha vakillari uchun vaksinatsiya majburiy etib qo‘yildi. Xususan, Boshqirdiston, Kemerovo viloyati, Leningrad viloyati, Moskva va Moskva viloyatida, Nenets avtonom okrugida, Sankt-Peterburgda, Tver viloyati, Tula viloyati va Xabarovsk o‘lkasida xodimlarning 60-80 foizi ikki oy ichida vaksinatsiyadan o‘tishi kerak.
Eslatib o‘tamiz, Moskvada o‘tgan oylarda COVID-19 bilan kasallanish darajasi ikki baravarga oshdi. Shaharda koronavirusga chalinganlar ko‘payib ketgani sababli yangi cheklovlar kiritildi. Moskva ortidan Sankt-Peterburg ham 17-iyundan COVID-19 cheklovlarini kuchaytirdi.
Izoh (0)