Agar Xitoy koronavirus kelib chiqishining sabablarini tekshirishga imkon bermasa, yakkalab qo‘yiladi. Bu haqda AQSh milliy xavfsizlik bo‘yicha maslahatchisi Jeyk Sallivan Fox News telekanaliga bergan intervyusida aytib o‘tdi.
Uning ta’kidlashicha, AQSh prezidenti Jo Bayden, avvalgi prezident Donald Trampdan farqli o‘laroq, “demokratik dunyoni birlashtira olgan” va G7 davlatlarini bir ovozdan Xitoyda COVID-19’ning kelib chiqishi bo‘yicha yangi tekshiruv o‘tkazish zarurligi haqida gapirishga undagan.
“Prezident Tramp buni uddalay olmagandi. Prezident Baydenning esa qo‘lidan keldi”, — dedi Sallivan.
“Dunyo xalqlarini birlashtirish” va XXRga siyosiy va diplomatik bosim o‘tkazish — bu amalga oshirilayotgan sa’y-harakatlarning asosiy qismidir, ularning maqsadi “Xitoy oldiga murakkab tanlov qo‘yishdir”: yoki Pekin infeksiya sabablarini “obdon tekshirishga” ruxsat beradi yoki XXR “xalqaro izolyatsiyaga duch keladi”.
G7 sammitidan so‘ng Pekin o‘z bayonotida G7 davlatlari Xitoyga bosim o‘tkazishga urinib, “xalqaro huquqning asosiy tamoyillarini jiddiy ravishda buzayotganini” aytgandi. Xitoy tomonining fikriga ko‘ra, COVID-19 pandemiyasi sabablarini o‘rganish siyosiylashtirilmasligi kerak. Jahon sog‘liqni saqlash tashkiloti (JSST) mutaxassislari virusning manbasini aniqlash uchun allaqachon ish olib bormoqda, dedi XXR.
G7 sammitidan so‘ng JSST rahbari Tedros Gebreyesus COVID-19 kelib chiqishi bo‘yicha tekshiruvning ikkinchi bosqichiga tayyorgarlik ko‘rilayotganini ma’lum qildi. Gebreyesus buning uchun Xitoydan oshkoralik va hamkorlik talab etilishini aytdi.
Eslatib o‘tamiz, JSSTning xalqaro mutaxassislar jamoasi Xitoyning Uxan shahrida to‘rt hafta mobaynida koronavirusning paydo bo‘lish sabablarini o‘rgangan edi. Mutaxassislar tekshiruv davomida Xitoy hukumati COVID-19’ga chalinish bo‘yicha ilk holatlar haqidagi ma’lumotlarni berishdan bosh tortgani haqida xabar qildi.
May va iyun oylarida esa Amerika ommaviy axborot vositalarida koronavirus Uxan shahridagi laboratoriyada yaratilganidan dalolat beruvchi belgilar haqida materiallar paydo bo‘la boshladi. Shuningdek, britaniyalik va norvegiyalik olimlar COVID-19 odamlar tomonidan yaratilganiga oid dalillar borligini aytgan.
Izoh (0)