Эрон халқи ўзгаришларни, коррупцияга қарши курашишни ва фаровонлик даражасини оширишни талаб қилмоқда, ушбу талаблар янги ҳукумат томонидан амалга оширилади. Бу ҳақда 21 июнь куни Эроннинг янги президенти Иброҳим Раисий лавозимига киришганидан кейинги биринчи матбуот анжуманида айтиб ўтди, деб ёзади «ТАСС».
«Эрон халқининг мурожаати — ўзгаришлар ҳақида. Эрон халқининг мурожаати — бу коррупция, қашшоқлик ва камситишларга қарши кураш, шунингдек адолатни таъминлаш ҳақида» — деди у.
Раисийнинг қўшимча қилишича, «бу янги ҳукумат қулоқ солиши лозим бўлган мурожаатдир».
Унинг сўзларига кўра, «ҳукуматнинг устувор йўналишлари ишбилармонлик муҳитини, одамлар ҳаётини ва ҳукуматдаги вазиятни яхшилаш, шунингдек маъмурий тизимни ислоҳ қилиш ва ўзгаришларга тўсқинлик қиладиган одатий бюрократияни йўқ қилишдан иборат бўлади».
«Эроннинг ядровий битими» ҳақида сўз кетар экан Раисийнинг таъкидлашича, агар битимнинг қолган қатнашчилари ўз мажбуриятларини тўлиқ бажарса, Эроннинг янги ҳукумати ҳам уни қўллаб-қувватлайди.
Шунингдек, Раисий Эроннинг ракета дастури халқаро музокараларда муҳокама қилинмаслигини айтди. «Бизнинг ракета дастуримиз ва ҳудудий масалалар муҳокама қилинмайди, келишилган, аммо амалга оширилмаган (ядровий битим қоидалари назарда тутиляпти) масалалар ҳал қилиниши лозим», — деди у
АҚШ билан муносабатлар борасида Раисий АҚШ президенти Жо Байден билан учрашиш нияти йўқлигини айтиб ўтди.
Замонавий Эрон тарихидаги ўн учинчи президентлик сайловлари 18 июль куни бўлиб ўтди. Унда Иброҳим Раисий 62 фоизга яқин овозни қўлга киритиб, давлат раҳбари бўлди.
Овоз беришда жами сайловчиларнинг 48,8 фоизи — 28,9 миллиондан ортиқ одам қатнашган.
Изоҳ (0)