Ҳиндистон шифокорлари коронавирусга чалинган беморда замбуруғ инфекциясининг учинчи турини аниқлади. Бу ҳақда DNA India агентлиги хабар берди.
Сариқ замбуруғ деб аталувчи мазкур инфекцияга чалиниш бўйича биринчи ҳолат Газиободда (Уттар-Прадеш штати) қайд этилган.
Маълум бўлишича, 45 ёшли бемор касалхонада бир неча ҳафта давомида COVID-19 билан курашиб, касалликдан тузалган эди, аммо кейин унинг аҳволи ёмонлашган: юзи шишиб кетганидан эркак кўзларини очолмай қолган, шунингдек, бурундан қон кетиш бошланган.
Отоларинголог шифокор Брайя Пал Тягининг маълум қилишича, касаллик аломатлари орасида ҳолсизлик, иштаҳанинг пасайиши ва вазннинг камайиши, жароҳат ўрнининг секин битиши мавжуд. Унинг сўзларига кўра, оғир ҳолатларда йиринглаш пайдо бўлади.
Тягининг таъкидлашича, сариқ замбуруғ одатда судралиб юрувчиларда учрайди, шифокор бу инфекцияни одамларда биринчи марта кўраётганини айтган Беморнинг аҳволини «жуда яхши деб бўлмайди», дея қўшимча қилган тиббиёт ходими.
DNA India маълумотларига кўра, муолажа учун беморга амфотерицин В — замбуруғларга қарши дори инъекциясини қилиш керак.
Times of India нашрининг ёзишича, мутахассислар сариқ замбуруғ инфекциянинг қолган икки турига қараганда анча хавфли бўлиши мумкинлигини айтмоқда, чунки у полиорган етишмовчилиги ва тўқима некрозини келтириб чиқариши мумкин.
Ҳиндистонда COVID-пандемия фонида одамларнинг хавфли замбуруғларга чалиниш ҳолатлари кўпайди. Мамлакатда коронавирус тарқалишининг иккиламчи таъсири сифатида пайдо бўлган қора замбуруғ эпидемияси фонида яна бир замбуруғ касаллиги аниқланди, у мамлакатда оқ замбуруғ деб аталади.
Замбуруғ касалликларини юқтириш хавфи иммунитети заиф кишиларда, шунингдек, тиббий касалликларга, жумладан, қандли диабетга чалинган, реанимацияда бўлган ва узоқ вақт стероид қабул қилган беморларда юқори бўлади.
Изоҳ (0)