Rossiyada COVID-19 bilan kasallangan bemorlarda qora zamburug‘ (mukormikoz)ga chalinish hollari qayd etildi, deb yozadi “Izvestiya”. Mukormikoz koronavirus bilan bog‘liq vaziyatning kuchayishi fonida Hindistonda keng tarqalgan.

Mukormikoz tabiatda keng tarqalgan mikroskopik zamburug‘lar (mukormitsetlar) keltirib chiqaradigan noyob infeksiya. Ular tuproqda yashaydi, ko‘pincha chirigan o‘simliklar va sabzavotlar yuzasida ajralib turadi.

Ushbu infeksiya burun, ko‘z va nafas olish tizimiga ta’sir qiladi. Kasallik burun bo‘shlig‘i va burun yondosh bo‘shliqlarida rivojlanib, ko‘z kosalariga tarqaladi. Infeksiya tushgan a’zolarda, ayniqsa, burunda to‘qima nekrozi tufayli o‘ziga xos qora qo‘tir paydo bo‘ladi.

Davo choralari ko‘rilmagan taqdirda, mukormikoz to‘satdan o‘limga olib kelishi mumkin, shu bilan birga, terapiya yordamida bemorlarning faqat 50 foizini saqlab qolish mumkin.

“Hozir Rossiyada Hindistondagi vaziyat bilan taqqoslanadigan biror nima yo‘q. Menga ma’lum bo‘lishicha, COVID-19 bilan kasallanganlarda mukormikozning uchrashi holatlari bir-ikki marta kuzatilgan. Ayni paytda bunday bemorlardan biri bizning mikologik klinikamizda davolanmoqda, umid qilamanki, u tuzalib ketadi”, — dedi Rossiya shimoli-g‘arbiy davlat tibbiyot universitetining klinik mikologiya, allergologiya va immunologiya kafedrasi mudiri Nikolay Klimko.

Shifokor ushbu muammoni faqat Hindistonga xos deb hisoblash noto‘g‘riligini ta’kidladi, chunki kasallik barcha mamlakatlarda uchraydi va Rossiya ham bundan mustasno emas.

“Ammo ba’zi bir bemorlarning kasallanish ehtimolini istisno qilib bo‘lmaydi. Avvalo mukormikoz immuniteti susaygan odamlar uchun xavflidir. COVID-19 bilan og‘rigan bemorlarda infeksiya odatda dekompensatsiyalangan qandli diabet fonida rivojlanadi. Hindistonda ushbu kasallikka chalingan bemorlarning ko‘pligi sababli mukormikoz yuqtirish darajasi yuqori”, — dedi Klimko.

Moskva fizika-texnika instituti genomik muhandislik laboratoriyasining boshlig‘i Pavel Volchkov harorat va namlik darajasi yuqori bo‘lgan mintaqalar mazkur infeksiyaning keng tarqalishi uchun qulay muhit ekanini aytdi.

“Ushbu kasallik Hindiston kabi tropik zonalarda joylashgan janubiy mamlakatlarga xosdir. Ammo zamburug‘ kasalliklari hamma joyga tarqalmoqda, chunki ular antibiotiklardan foydalanish bilan bog‘liq”, — deydi mutaxassis.