AQSh Belarusda ekstremistik nashr deb topilgan Nexta internet-resursining sobiq rahbari Roman Protasevichni ozodlikka chiqarishni talab qilmoqda. U Ryanair aviakompaniyasi samolyotini favqulodda Minsk aeroportiga qo‘ndirish orqali hibsga olingandi. Bu haqda AQSh davlat kotibi Entoni Blinken ma’lum qilgan, deya xabar berdi “Interfaks”.
“AQSh Yevroittifoqqa a’zo ikki mamlakat hududidan favqulodda ravishda samolyot reysining qaytarilishi va havo kemasi bortida bo‘lgan jurnalist Roman Protasevichni Minskda hibsga olinishini keskin qoralaydi. Biz uni zudlik bilan ozodlikka chiqarilishini talab qilamiz”, – deyiladi Blinken bayonotida.
U Lukashenko hukumati amalga oshirgan mazkur kutilmagan va shubhali harakat 120 dan ziyod yo‘lovchisi bo‘lgan samolyotdagi odamlar hayotini ham xavf ostida qoldirgani va ular orasida AQSh fuqarolari ham bo‘lganini qayd etgan.
Blinkenning aytishicha, mustaqil OAV demokratik jamiyatning asosiy shartlaridan biri va qonuniylikning birlamchi mezonlaridan hisoblanadi. Shuningdek, AQSh davlat kotibi Vashington Belarusda yana jurnalistlarning ta’qibga uchrashi hamda hibsga olinishini keskin qoralashini aytdi.
AQSh davlat kotibi mamlakatning Yevropa ittifoqi davlatlaridagi hamkorlar, Litva va Gretsiya rasmiylari bilan Ryanair samolyotining Belarusga qo‘ndirilgani yuzasidan maslahatlashuvlar o‘tkazishga tayyor ekanligini bildirdi.
Blinken sodir bo‘lgan voqea yuzasidan surishtiruv o‘tkazishga chaqirdi“Mazkur holatda samolyotni favqulodda qo‘ndirishga majburlanganini inobatga olib, Xalqaro fuqarolik aviatsiyasi tashkilotidan mazkur o‘ylanmay qilingan harakat yuzasidan tezkor tarzda yig‘ilish o‘tkazishga va mazkur vaziyatlar yuzasidan taftish boshlashga chaqiramiz, bunda ularga amaliy ko‘mak berishga tayyorligimizni bildiramiz”, – degan AQSh davlat departamenti rahbari.
Ryanair aviakompaniyasining samolyoti 23-may kuni Minskka favqulodda qo‘nishni amalga oshirgan. Samolyot bortida Belarusda ekstremistik internet-resurs deb tan olingan Nexta’ning sobiq bosh muharriri Roman Protasevich Afinadan Vilnyusga yo‘l olayotgan edi. Samolyot qo‘ndirilgach, u hibsga olingan.
Litva prezidentining tashqi siyosiy masalalar bo‘yicha bosh maslahatchisi Asta Skaysgiritening so‘zlariga ko‘ra, fuqarolik samolyotining yo‘nalishini o‘zgartirish uchun MiG-29 qiruvchi samolyoti hamda Mi-24 harbiy vertolyotidan foydalanilgan.
Avval Yevroittifoq kengashi rahbari Sharl Mishel Yevroittifoqning 24-mayda bo‘lib o‘tadigan navbatdagi sammitida Ryanair samolyotining Minskka favqulodda qo‘nganligi masalasini muhokama qilishni taklif etgan.
Shuningdek, AQSh, Buyuk Britaniya, Germaniya, Irlandiya, Latviya, Litva, Polsha va Chexiya davlatlari Belarus osmonidan uchib o‘tishni taqiqlashni talab qilgan.
Izoh (0)